Трэнер футбольнага клубу Аляксандр Лухвіч заяўляе, што сыну больш машыну не дадуць.
Сын галоўнага трэнера футбольнага клубу «Менск», малады футбаліст Ілля Лухвіч, рэгулярна парушае правілы дарожнага руху, і яшчэ хваліцца гэтым у «Інстаграме». Пасля публікацыі падборкі ягоных парушэнняў у медыях ягоны бацька, галоўны трэнер ФК «Менск» Аляксандр Лухвіч, папрасіў прабачэння ў каментарах ды паведаміў, што сына ўжо затрымала міліцыя.
У размове з «Белсатам» Аляксандр Лухвіч прызнаўся, што сын меў спагнанні за парушэнні на дарозе: штрафы прыходзілі пераважна за перавышэнне хуткасці пасля таго, як ён трапляў у камеры відэарэгістрацыі. Лухвіч падкрэслівае, што аўта не ягонае, а належыць ягонай жонцы.
«Правы ў сына ёсць, ён браў машыну, каб ездзіць ува ўніверсітэт».
Паводле бацькоў, даваць машыну сыну больш не будуць.
«Мы з жонкай ужо купілі яму талончыкі на праезд», – дадае Лухвіч.
Паводле Аляксандра Лухвіча, Ілля ўсцяж знаходзіцца ў міліцыі і бацькам яшчэ не ўдалося з ім паразмаўляць. Апроч адказнасці перад законам, ліхача чакае таксама пакаранне ўнутры сям«і.
«Што за пытанні? Канешне, накажам. Якія бацькі не зрабілі б гэтага ў такой сітуацыі?», – кажа Лухвіч.
Сам спадар Аляксандр маральна гатовы да таго, што ягоная кар’ера трэнера можа скончыцца, а яму прыйдзецца чысціць снег або касіць газон.
«Цяпер усё залежыць ад кіраўніцтва клубу, трэнер ж сам сябе трэнерам не прызначае», – працягвае Лухвіч.
Іллю Лухвічу – 19 гадоў. Ён пайшоў па слядах бацькі, заняўшыся футболам з маленства. Дзіцячую кар’еру правёў у структуры ФК «Менск».
У 2016-м ён дэбютаваў як нападнік у моладзевым складзе клубу. У мінулым сезоне Ілля граў у «Чысці» з Першай лігі. Не забіўшы аніводнага мяча ў 11 гульнях, ён патрапіў у рэзервовы склад «Промня».
Дзяніс Дзюба, Дар’я Румянцава belsat.eu
