Бабруйск: сотні брутальных затрыманняў, зніклыя людзі

Цягам трох вечароў, 9, 10 і 11 жніўня, у Бабруйску АМАП жорстка затрымліваў людзей, збіваў, нягледзячы на пол і ўзрост: пад дубінкі траплялі і жанчыны, і 18-гадовыя юнакі. Мясцовыя СІЗА і ІЧУ перапоўненыя. Суды праводзяць адразу там, у закрытым рэжыме, без сведкаў і абаронцаў. Некаторым даюць вялізныя штрафы, астатнім – содні арышту.

Клалі тварам у асфальт і моцна білі – рукамі, нагамі, дубінкамі

Мы спрабуем высветліць імёны і лёс затрыманых бабруйцаў. Распавядаем, што нам стала вядома.

Людзi перад ІЧУ перад тым, як наляцеў АМАП. Фота прадстаўленае рэдакцыі сведкамі падзеяў

Масавае брутальнае затрыманне адбылося ў Бабруйску 10 жніўня каля мясцовага ізалятару часовага ўтрымання. Там сабраліся родныя затрыманых напярэдадні, 9 жніўня. Людзі спакойна стаялі ды чакалі вынікаў судоў, якія, паводле словаў працаўнікоў ІЧУ, мусілі быць гатовыя да 18-й гадзіны. Прыкладна а 16-й гадзіне раптоўна з’явіўся АМАП. Байцы падляталі да людзей, жанчын адштурхоўвалі, мужчын і хлопцаў клалі тварам у асфальт і моцна збівалі. Журналістам не дазвалялі здымаць, пагражаючы, што разаб’юць тэлефоны і адаб’юць рукі.

Кіраваў гэтай аперацыяй Андрэй Малахаў – намеснік начальніка УУС Бабруйскага гарвыканкаму, начальнік міліцыі грамадскай бяспекі УУС (на фота).

Усіх мужчынаў паставілі тварам да плота з рукамі на патыліцы, білі па нырках. Праз некалькі хвілінаў прыехала падмацаванне – яшчэ каля 15–20 амапаўцаў у шлемах і поўным абмундзіраванні. Затрыманых запхалі ў аўтобусы. Там ім не давалі падняць галавы – прымушалі сядзець з рукамі на патыліцы і галавой, схіленай да каленяў.

На вуліцу выбеглі мясцовыя жыхаркі. Жанчыны крычалі: «Навошта вы б’яце нашых дзяцей?». Падышла манашка з мясцовага касцёлу – яна стаяла каля дарогі і малілася, заклікаючы жанчын не крычаць, а таксама маліцца.

Сярод затрыманых мужчынаў аказаўся бабруйскі журналіст Яўген Глаголеў-Васьковіч. Ён прыйшоў да ІЧУ разам з жонкай Александрынай. Дзяўчыну міліцыянт сілай адвёў убок, а Яўгена забралі. На судзе без сведкаў і абаронцы асудзілі на 12 содняў у СІЗА.

Яўген Глаголеў-Васьковіч з жонкай

У бабруйчанкі Галіны Юшкоўскай каля ІЧУ затрымалі сына Яўгена. Разам з ім яны прыйшлі пад браму ізалятару, каб даведацца пра лёс затрыманага 9 жніўня пляменніка жанчыны Андрэя Тарабенкі (пазней высветлілася, што яго асудзілі на 17 содняў).

На вачах Галіны, калі падбег АМАП, яе сына сцягнулі з ганка, паклалі тварам на зямлю і пачалі моцна біць. Пазней у міліцыі жанчыне сказалі, што ён затрыманы за ўдзел у несанкцыянаваным масавым мерапрыемстве.

«Але якое мерапрыемства? Дзе яно было? Калі б выйшаў нейкі міліцыянт ды сказаў нам, што тут быць нельга, разыходзьцеся, ці ж мы не пайшлі б? – пытаецца маці збітага хлопца. – Але ж нам ніхто не сказаў, толькі прыляцелі амапаўцы і пачалі ўсіх без разбору біць».

Галіна Юшкоўская напісала заяву ў пракуратуру Бабруйску пра тое, што адбывалася каля ІЧУ. Але ў справядлівы разгляд скаргі яна не верыць.

АМАП у Бабруйску. Фота: «Белсат»

«Мне ў пракуратуры сказалі: а вы што, не разумееце, што нельга цяпер выходзіць на вуліцы? – распавяла жанчына. – Такая, маўляў, цяпер сітуацыя ў краіне, народ сам правакуе. Я запыталася тады: дык што ж далей будзе? У адказ пачула – светлая паласа. Я не стала далей спрачацца, каб не нагаварыць сабе на некалькі содняў».

Яўген быў асуджаны на двое содняў у СІЗА. Ужо сёння, 12 жніўня, яго мусяць вызваліць.

11 жніўня судзілі бабруйчаніна Дзмітрыя. Ён ехаў на сваім аўтамабілі па вуліцы Пушкіна, дзе месціцца ІЧУ, і стаў сведкам брутальных затрыманняў. Як распавяла Галіна Юшкоўская, якая таксама там была, і бачыла, як гэта ўсё адбывалася, Дзмітрыя спыніла ДАІ, нібыта за тое, што ён не адрэагаваў на іхнія сігналы. Да машыны падбеглі амапаўцы, разбілі шкло ў задніх дзверцах і выцягнулі мужчыну. Яго паклалі на асфальт і пачалі моцна збіваць.

Разбiтае шкло машыны Змiцера, праз якое яго выцягвалі

«Яны білі рукамі, нагамі, дубінкамі, – распавяла Галіна. – Я баюся, што ў яго могуць быць сур’ёзныя траўмы».

Дзмітрыя разам з астатнімі затрыманымі запхнулі ў аўтобус і павезлі ў невядомым кірунку. Як распавяла ягоная жонка Лідзія, мужчына правёў ноч у СІЗА, і пасля суда яго адразу адпусцілі.

«Ненавіджу гэтую ўладу і таго, хто гэтым кіруе!»

Абураны дзеяннямі міліцыі і ўладаў бабруйскі пенсіянер Леанід Юшкевіч. Ягонага сына Аляксея затрымалі 9 жніўня – таксама выцягнулі з аўтамабіля разам з сябрамі. Спадара Леаніда моцна раззлавала тое, што ён быў вымушаны шукаць сына, што ніхто не хацеў казаць, дзе Аляксей, за што затрыманы.

«Яны забарыкадаваліся там у РАУСе, як вошы, – кажа пенсіянер. – Я быў шакаваны, калі ўсё гэта пабачыў, што звычайны грамадзянін не можа зайсці, запытацца і атрымаць адказы на свае пытанні. Я ім так і сказаў: я не для гэтага будаваў гэтыя сцены, каб вы тут пазамыкаліся!»

АМАП у Бабруйску. Фота: «Белсат»

Леаніду ў Ленінскім РАУСе Бабруйску расказалі, што 9-га ўвечары затрымалі сто чалавек.

У чарговы раз мужчыну раз’юшыла, што ў яго не ўзялі перадачу для сына – ні 10 жніўня, ні 11-га. Спаслаліся на тое, што шмат людзей было затрымана. Не можа пенсіянер і адысці ад уражанняў ад затрыманняў каля ІЧУ. Сам ён паспеў з’ехаць адтуль раней.

«Што ж гэта адбываецца? – пытаецца пенсіянер. – Людзі прыйшлі пад ізалятар даведацца пра лёс родных, у слязах, у страху, а іх яшчэ і адмалацілі ўсіх дубінкамі ды кінулі на содні. У нас уся Беларусь ужо турма! Я ненавіджу гэтую ўладу і таго, хто ўсім гэтым кіруе».

Аляксея Юшкевіча асудзілі на 7 содняў. Перадачу для яго ў ІЧУ ўзялі толькі пасля таго, як Леанід пачаў змагацца, пайшоў у УУС, сказаў, што пойдзе да старшыні гарвыканкаму, калі рэчы і ежу для сына не прымуць.

«Што гэта за стаўленне, я пытаюся? Як да свіней! Чалавека затрымалі, дык ён там што – ні памыцца, ні зубы пачысціць не мае права?» – спадар Леанід не можа стрымліваць эмоцыяў у размове.

У Аляксея Юшкевіча дома засталіся жонка і двое дзяцей – 2 і 9 гадоў. Паводле спадара Леаніда, яны з’ехалі са сваёй кватэры, бо вельмі баяцца, што могуць прыйсці і па іх.

«Паставілі на калені і білі рукамі, нагамі, шчытамі. Я ў думках развітваўся з сям’ёй». Аповед затрыманага на «Пушкінскай»

Брутальна затрымалі бабруйскага журналіста, у мінулым – дэпутата гарадскога савету Алеся Чыгіра. Мужчына стаў сведкам затрыманняў на вуліцах гораду 10 жніўня і зняў гэта на тэлефон. Увечары ён зайшоў да жонкі Дануты Чыгір на працу ў аптэку, каб разам пайсці дадому. Але раптоўна за ім уварвалася міліцыя, выламаўшы дзверы. Адзін з супрацоўнікаў ударыў жанчыну ў твар, адштурхнуў. Алеся збілі з ног і выцягнулі ў аўтазак. У СІЗА мужчыну асудзілі на 15 содняў арышту.

Пасля закрыцця ўчасткаў 9 жніўня ў Бабруйску знікла назіральніца

Сярод затрыманых – бабруйскі гісторык і краязнаўца Зміцер Шапялевіч. Яго схапілі 10 жніўня, каля 20-й гадзіны вечара, на плошчы Леніна. Як распавяла жонка Змітра Дар’я, ён паспеў ёй напісаць з аўтазака і распавесці, што яны з сябрам проста гулялі па плошчы, на якой усё было ціха і спакойна, ніякіх акцый, скандаванняў. Але раптам з-за будынку гарвыканкаму вылецела «туча амапаўцаў», якія пачалі хапаць людзей без разбору. Сябар Зміцера паспеў уцячы, а яму скруцілі рукі і кінулі ў аўтазак.

У белым і з кветкамі. Жанчыны выходзяць на пікеты, каб выказацца супраць гвалту на вуліцах Беларусі

«Больш за ўсё абурае, што ніхто не папярэджваў, што там нельга хадзіць, што разыходзьцеся, – кажа Дар’я. – Не, яны проста выбягаюць з-за вуглоў, раптоўна, і такімі вось набегамі ўвесь вечар і ноч лавілі людзей у горадзе. Нават дзяўчат маладых, ні на што не глядзелі. А яшчэ – ніякага права званка для затрыманага, нічога, нават родным не паведамляюць».

Судзілі Змітра адразу ў СІЗА, без сведкаў і абаронцы. Далі 10 содняў. У Дар’і ды Змітра двое малых дзяцей – 9 і 10 гадоў.

11 жніўня на волю выйшла Галіна Смірнова, каардынатарка кампаніі «Права выбару», затрыманая яшчэ 8 жніўня разам з мясцовым актывістам Андрэем Абрамовічам. Галіну Смірнову абвінавацілі ў арганізацыі незаконнага мітынгу каля будынку суда Бабруйскага раёну і г. Бабруйска. Напярэдадні, 7 жніўня, там судзілі незалежных назіральнікаў, затрыманых на выбарчых участках. Галіна вырашыла сфатаграфавацца з плакатам Святланы Ціханоўскай у руцэ. Гэта бачыў начальнік аддзелу аховы правапарадку і прафілактыкі УУС Бабруйскага гарвыканкаму падпалкоўнік Сяргей Рудзько. Людзі, што прысутнічалі, каля суда, прыйшлі падтрымаць схопленых назіральнікаў. Але міліцыя палічыла, што гэта быў несанкцыянаваны мітынг.

Галiна Смiрнова, каардынатар кампанii «Права выбару» пасля выхаду з ІЧУ 11.08

Смірнова правяла трое содняў у ІЧУ. Яе хацелі судзіць наўпрост там. Але актывістка настаяла на абароне, і суддзя Вольга Серакова задаволіла гэтае хадайніцтва. Суд перанеслі на 20 жніўня.

9 жніўня ў Бабруйску знікла незалежная назіральніца Святлана Сасонкіна. Дзяўчына паехала дамоў з участка № 17, адкуль людзей разганяў АМАП, і з таго часу не выходзіць на сувязь. Ейныя родныя і сябры напісалі заяву аб знікненні чалавека.

Акцыі пратэстаў адбываюцца ў дзясятках гарадоў Беларусі з 9 жніўня.

НА belsat.eu

Hавiны