Прэтэндэнту на пасаду прэзідэнта Беларусі, экс-кіраўніку «Белгазпрамбанку» Віктару Бабарыку 20 чэрвеня выставілі крымінальнае абвінавачванне, піша «Интерфакс-Запад».
«Віктару Бабарыку, які знаходзіцца ў СІЗА КДБ, сёння выстаўленае абвінавачванне. Артыкул, па якім абвінавачанне выстаўленае, я не магу назваць у рамках падпіскі аб неразгалошванні матэрыялаў справы», – сказаў адвакат палітыка Дзмітрый Лаеўскі.
Паводле яго, патэнцыйны кандыдат «катэгарычна не згодны з выстаўленым абвінавачваннем», а абарона настойвае на яго поўнай невінаватасці.
Адвакат абскардзіў затрыманне Віктара Бабарыкі, але скарга пакуль не разгледжаная.
Абарону палітыка вядуць тры адвакаты, у ягонага сына і кіраўніка штабу Эдуарда Бабарыка – два абаронцы.
Прэтэндэнт у прэзідэнты Беларусі Віктар Бабарыка быў затрыманы 18 чэрвеня разам з сынам. Ператрусы і затрыманні ў звязаных з ім фірмах пачаліся за тыдзень да таго. Тым не менш, палітык паспеў здаць неабходную для яго вылучэння кандыдатам у прэзідэнты колькасць подпісаў. Палітык прызнаны палітвязнем.
МГ belsat.eu