Пасажырскі цягнік са 131 пасажырам, які накіроўваўся ў Капенгаген, рэзка затармазіў і сышоў з рэек пасля таго, як яго зачапіла кавалкам брызенту ад грузавога цягніка, што ехаў насустрач. Аварыя адбылася на мосце праз пратоку Стобэльт у Даніі падчас моцнай завеі, якая раней ужо прывяла да шэрагу ДТЗ.
У выніку аварыі мінімум шэсць чалавек загінулі і 16 атрымалі раненні. Праз завею ратавальнікі і медыкі доўга дабіраліся да цягнікоў на мосце.
Вядома, што грузавы цягнік, які трапіў у аварыю, перавозіў піва кампаніі Carlsberg.
18-кіламетровы мост праз пратоку Стобэльт – частка інфраструктуры, якая злучае Данію і Швецыю. Прэм’ер-міністры Даніі і Швецыі выказалі спачуванні пацярпелым і семʼям загінулых.
