Актывісты праваабарончага цэнтру «Вясна» маюць сурʼёзны намер наконт аўтазаку, што прадае менская міліцыя. Яны плануюць запусціць кампанію па збору сродкаў на пакупку і, калі атрымаецца сабраць патрэбную суму, зрабіць з аўтазаку дызайнерскі аўтамабіль.
«Мы цяпер падумваем абвесціць краудфандынгавую кампанію, бо ў нас, канешне, няма такіх сродкаў. Зараз будзем шукаць асістэнта, які дапаможа нам з распрацоўкай кампаніі. Пакуль што ў нас быў толькі накід ідэяў», – кажа Наста Лойка, праваабаронца «Вясны».
Менская міліцыя прадае аўтазак за 16,5 тысячаў беларускіх рублёў.
3 жніўня ў Facebook праваабаронцы выклалі свае фотаздымкі з плакатамі «Мы хочам аўтазак» і выявай аўтазаку ў падарункавай абгортцы. Правааабаронца Анісія Казлюк напісала:
«Абяцаем дыскашар унутры, адну белую сценку (для прагляду фільмаў), руль, абгорнуты ў поўсць, і змяняць дызайн аўтазаку не радзей чым раз на паўгады»
ВЧ, belsat.eu