Праваабарончы цэнтр «Вясна» паведамляе пра знікненне апазіцыйнага блогера з Барані (Аршанскі раён) Змітра Казлова, больш вядомага як Шэры Кот.
Тэлефон Казлова недасяжны, а акаўнт у «Укантакце» ўзламаны. У іншых сацыяльных сетках апошнія два дні ён не з’яўляецца. 19 снежня ў яго мусіў быць суд у Менску за ўдзел у несанкцыянаванай масавай акцыі.
Сайт orsha.eu адзначае, што блогер ісці на суд не збіраўся ды зʼехаў з Барані. У Менску ён таксама не зʼяўляўся.
Зараз Зміцер Казлоў знаходзіцца ў Менску на акцыі на Кастрычніцкай плошчы ў падтрымку незалежнасці Беларусі. У каментары belsat.eu ён заявіў, што наўмысна выключыў тэлефон, каб даехаць без перашкодаў.
Паводле інфармацыі «Вясны», напярэдадні акцыі за незалежнасць у Менску міліцыянты дзяжураць каля дамоў шэрагу актывістаў: Андрэя Войніча ў Менску, Андрэя Шарэнды ў Берасці і Мікалая Саляніка ў Горадні.
МГ belsat.eu
