Актывісты просяць дазволіць шэсце ад будынку Нацыянальнай акадэміі навук да плошчы Бангалор. Марш пройдзе «пад лозунгамі адмовы ад выплаты падатку на «дармаедства» як неканстытуцыйнага і абароны сваіх правоў».
Свае подпісы пад заявай у гарвыканкам паставілі адказны сакратар аргкамітэту па стварэнні партыі «Беларуская хрысціянская дэмакратыя» Дзяніс Садоўскі, старшыня Беларускай сацыял-дэмакратычнай партыі (Грамада) Ірына Вештард, намеснік старшыні Беларускай партыі «Зялёныя» Дзмітрый Кучук і актывіст Абʼяднанай грамадзянскай партыі Уладзімір Лабудоў.
«Фармат акцыі прадугледжвае, што гэта будзе шэсце не для апазіцыі, а для новых людзей, якія не задаволеныя ўказам і якія ўжо цяпер гатовыя адстойваць свае правы. Плануецца, што акцыя будзе дазволеная, і ў ёй возьмуць удзел максімальнай колькасці людзей», – сказаў БелаПАН Дзяніс Садоўскі.
Яшчэ адзін «Марш абураных беларусаў» пройдзе 17 лютага ў сталіцы – менчукоў на яго запрасіў Мікола Статкевіч.
Арганізатары «Маршу недармаедаў» спадзяюцца, што мітынгі за адмену дэкрэту № 3 «Аб сацыяльным утрыманстве» выведуць на вуліцы тысячы праціўнікаў закону, які ў Беларусі называюць нялюдскім.
Кампанія збору подпісаў за адмену дэкрэту № 3 пачалася 17 студзеня. На сённяшні дзень петыцыя за адмену дэкрэту аб дармаедах сабрала больш 20 тысяч подпісаў.
ДР belsat.eu