Аляксандру Лукашэнку і яшчэ 29 беларускім афіцыйным асобам забаронены ўезд у краіны Балтыі. Пра гэта заявілі знешнепалітычныя ведамствы Латвіі і Эстоніі, а таксама міністэрства ўнутраных справаў Літвы.
Усім асобам з санкцыйнага спісу забаронены ўезд у краіны Балтыі.
Поўны спіс асобаў, якім забаронены ўезд у краіны Балтыі:
- Аляксандр Лукашэнка, кіраўнік Беларусі
- Віктар Лукашэнка, старэйшы сын Аляксандра Лукашэнкі, сябра Савету бяспекі Беларусі
- Ігар Сергеенка, кіраўнік адміністрацыі Аляксандра Лукашэнкі
- Максім Рыжанкоў, першы намеснік кіраўніка адміністрацыі Лукашэнкі
- Вольга Чупрыс, намесніца кіраўніка адміністрацыі Лукашэнкі
- Дзмітры Круты, намеснік кіраўніка адміністрацыі Лукашэнкі
- Генадзь Богдан, намеснік кіраўніка Кіраўніцтва справамі прэзідэнта
- Лідзія Ярмошына, кіраўніца Цэнтральнай выбарчай камісіі
- Вадзім Іпатаў, дырэктар Нацыянальнага цэнтру заканадаўства і прававых даследаванняў
- Алена Дзьмухайла, юрыстка Цэнтральнай выбарчай камісіі
- Святлана Кацуба, сябра Цэнтральнай выбарчай камісіі
- Ігар Плышэўскі, сябра Цэнтральнай выбарчай камісіі, начальнік упраўлення юстыцыі Менгарвыканкаму
- Алег Сліжэўскі, сябра Цэнтральнай выбарчай камісіі, міністр юстыцыі
- Ірына Целікавец, сябра Цэнтральнай выбарчай камісіі, супрацоўніца Міністэрства юстыцыі
- Валеры Вакульчык, старшыня КДБ
- Іван Церцель, старшыня Камітэту дзяржкантролю
- Іван Наскевіч, старшыня Следчага камітэту
- Аляксандр Канюк, генеральны пракурор
- Юрый Караеў, міністр унутраных спраў
- Генадзь Казакевіч, першы намеснік міністра ўнутраных спраў
- Аляксандр Барсукоў, намеснік міністра ўнутраных спраў
- Сяргей Хаменка, намеснік міністра ўнутраных спраў
- Юры Назаранка, намеснік міністра ўнутраных спраў
- Раман Мельнік, начальнік галоўнага ўпраўлення аховы правапарадку і прафілактыкі МУС
- Іван Кубракоў, начальнік ГУУС Менгарвыканкаму
- Алег Шаблыка, намеснік начальніка Дэпартаменту аховы МУС
- Андрэй Раўкоў, кіраўнік Савету бяспекі Беларусі
- Аляксей Волкаў, першы намеснік старшыні Следчага камітэту
- Сяргей Аземша, намеснік старшыні Следчага камітэту
- Андрэй Смаль, намеснік старшыні Следчага камітэту.
Паводле МЗС Латвіі, вышэй пералічаныя асобы сваімі асабістымі дзеяннямі арганізоўвалі і падтрымлівалі фальсіфікацыю выбараў прэзідэнта Беларусі 9 жніўня 2020 году, а таксама падтрымлівалі гвалтоўнае падаўленне мірных пратэстаў.
Прэзідэнт Літвы Гітанас Наўседа заявіў, што гэта толькі пачатковая версія спісу. Паводле прэзідэнта Літвы, «без сумневу, гэты спіс у будучыні будзе дапаўняцца новымі прозвішчамі прадстаўнікоў улады».
У Вільні заявілі, што адзін з фігурантаў спіса «за апошнія пяць гадоў наведваў Літву 15 разоў».
