Міністр інфармацыі Лілія Ананіч пракаментавала затрыманні аўтараў расейскіх інфармацыйных рэсурсаў Regnum, Lenta.ru, Eurasia Daily за антыбеларускія артыкулы.
Паводле Ананіч, аналіз інфармацыйнай прасторы выявіў, што ў апошні час пачасціліся факты зʼяўлення матэрыялаў тэндэнцыйнага, а часам і адкрыта дэструктыўнага характару ў дачыненні да Беларусі, дзяржаўнай улады нашай краіны, беларускага народа.
«У тым ліку неаднаразова мелі месца факты публікацыі падобных матэрыялаў на расейскіх інфармацыйных рэсурсах Regnum, Lenta.ru, Eurasia Daily ды іншых. У такіх публікацыях ставіцца пад сумненне суверэнітэт Беларусі, утрымліваюцца абразлівыя выказванні ў адрас беларускага народа, яго гісторыі, мовы, культуры».
Найбольшую актыўнасць у публікацыі такога роду матэрыялаў праяўляе інфармагенцтва Regnum, падаючы ў тэндэнцыйным ключы дзейнасць кіраўніка беларускай дзяржавы, уладных структур у розных галінах – палітыцы, эканоміцы, культуры, адзначыла Ананіч.
Яна дадала, што пра падобныя факты беларускі бок інфармуе расейскіх калег і прапануе прыняць меры па фактах такіх публікацый, у тым ліку ў адпаведнасці з расейскім заканадаўствам.
У лістападзе яна звярнулася ў Міністэрства сувязі і масавых камунікацый Расеі, Федэральную службу па наглядзе ў сферы сувязі, інфармацыйных тэхналогіяў і масавых камунікацый, а таксама да спецыяльнага прадстаўніка прэзідэнта Расеі па міжнароднай культурнай супрацы Міхаіла Швыдкога.
Ад яго прыйшоў адказ, у якім падкрэслена, што абразлівыя ў дачыненні да Беларусі выказванні належаць «часцяком маргіналізаваным аўтарам, ні ў якай меры не адлюстроўваюць ані пазіцыю кіраўніцтва Расеі, якая нязменна імкнецца да паглыблення расейска-беларускага ўзаемадзеяння ва ўсіх галінах супрацы, ані традыцыйна сяброўскага стаўлення да Беларусі і яе народу з боку расейцаў».
«Відавочна, што заказчыкі і аўтары такіх артыкулаў спрабуюць пасеяць варожасць паміж нашымі краінамі і народамі. Безумоўна, гэта не пазіцыя расейскага кіраўніцтва, а тых дэструктыўных сіл і колаў, якія спрабуюць убіць клін у нашы глыбокія сяброўскія адносіны, у працэс будаўніцтва Саюзнай дзяржавы», – лічыць міністр.
Следчы камітэт затрымаў адразу трох калумністаў расейскіх выданняў Regnum, Lenta.ru і EADaily. Адзін з іх выкладчык БДУІР Юрый Паўлавец, другі – школьны вартаўнік к з Берасця Дзмітрый Алімкін, трэці – Сяргей Шыпценка.
Юрый Паўлавец шмат пісаў пра «рост нацыяналізму» ў Беларусі. Дзмітрый Алімкін у адным са сваіх матэрыялаў называў беларускую мову дыялектам расейскай мовы, а саміх беларусаў – мясцовай ідэнтычнасцю ў складзе рускага народа. У адным з апошніх тэкстаў Сяргея Шыпценка напісана, што пасля распаду СССР Беларусь скацілася да стану «рэгіянальнай правінцыі».
На іх завялі крымінальную справу за распальванне нацыянальнай варожасці. Аўтарам-беларусафобам можа пагражаць ад 5 да 12 гадоў зняволення.
ДР belsat.eu паводле tut.by, belta.by