Амерыканскі дыпламат, які пачаў пацяпленне з Беларуссю, сышоў з Дзяржаўнага дэпартаменту


Аляксандр Лукашэнка і Ўэс Мітчэл сустрэліся ў Менску. Фота president.gov.by

Ўэс Мітчэл, які назваў Беларусь «часткай бастыёну, які абараняе ад расейскага неаімперыялізму»», сышоў з пасады першага памочніка дзяржсакратара.

Паводле Washington Post, Мітчэл у адрозненні ад часоў Абамы вёў перамовы з аўтарытарнымі лідарамі, а таксама пазбягаў канфліктаў з краінамі НАТО, з якімі не згаджаліся ЗША наконт іх унутранай палітыкі, у тым Турцыі і Венгрыі. Гэта мела аказаць «станоўчы ўплыў» на саюзнікаў і краіны, якія «не сябруюць» з ЗША. Усё гэта для стварэння эфектыўнай процівагі Расеі ды Кітая.

Сваё крэда амерыканскі дыпламат агучыў падчас выступу ў Атлантычным Савеце. Апісаў у ім Украіну, Грузію і нават Беларусь «франтавымі краінамі», якія з’яўляюцца «часткай бастыёну, які абараняе ад расейскага неаімперыялізму». Менавіта таму, на ягоную думку, ЗША павінны падтрымліваць суверэнітэт гэтых краін супраць расейскага ўварвання.

ЗША: Грузія, Украіна і «нават Беларусь» – бастыёны супраць расейскага неаімперыялізму

Ягоная стратэгія спрыяла прарыву ў амерыкана-беларускіх дачыненнях. Дыпламат наведаў Менск і сустрэўся з Лукашэнкам, які яго нават пахваліў. Тады з вуснаў кіраўніка Беларусі прагучалі важныя словы.

«Я абяцаю, што беларусы будуць вам самымі надзейнымі і сумленнымі партнёрамі. Калі мы вам нешта паабяцаем, нават на шкоду сабе мы гэта выканаем», – гаварыў Лукашэнка падчас сустрэчы.

Лукашэнка прадстаўніку Дзярждэпу: будзем надзейнымі партнёрамі. Тлумачым, чаму эксперты ў бяспецы прыехалі ў Менск

Дыпламат таксама ўсклаў кветкі да помніка Янкі Купалы. Букет быў у колерах бел-чырвона-белага сцяга.

У выніку Беларусь зняла абмежаванне на колькасць дыпламатаў ЗША ў Менску. А гэта азначае нармалізацыю дыпламатычных адносінаў.

Крызіс паміж ЗША і Беларуссю працягваецца з 2006 году, калі пасля дэманстрацыі ў Менску і хвалі рэпрэсіяў супраць апазіцыі, ЗША ўвялі санкцыі супраць Лукашэнкі і найбуйнейшых дзяржаўных прадпрыемстваў.

Беларусь зняла абмежаванне на колькасць дыпламатаў ЗША ў Менску

Паводле часопісу, Мітчэл патлумачыў сваё рашэнне асабістымі прычынамі – адсутнасцю часу для дзяцей. Дыпламат таксама даў высокую ацэнку працы дзяржсакратара ЗША Майка Пампэёў. Аднак, як падкрэслівае Washington Post, Мітчэл далучыўся да значнай групы чыноўнікаў Дзярждэпу, які вырашылі сысці ў адстаўку падчас прэзідэнцтва Доналда Трампа.

ЯБ/ДР belsat.eu

Глядзі таксама
Каментары