Амбасадар Украіны ў Беларусі Ігар Кізім: «Нiчога добрага ад Расеi мы не чакаем»


Амбасадар Украіны ў Беларусі Ігар Кізім сустрэўся ў Менску з беларускімі журналістамі і распавёў пра некалькі важных момантаў з нагоды сітуацыі ў Керчанскай пратоцы.

«Адбылася наўпроставая расейская агрэсія, бо, паводле марскога права, тэрыторыя карабля – гэта тэрыторыя дзяржавы, пад чыім сцягам ідзе карабель», – заявіў Ігар Кізім.

Ігар Кізім, фота TUT.BY

Пра агрэсію з боку Расеі

Паводле словаў амбасадара, Расея «ўзвяла хлусню ў ступень дзяржаўнай палітыкі».

«Увесь свет ведае пра агрэсію РФ, але не было доказаў. Гэтым разам агрэсія супраць суверэннай дзяржавы была непрыхаваная нічым – ні зялёнымі чалавечкамі, ні сіне-чырвонымі сцягамі».

Спадар Кізім таксама дадаў, што «нiчога добрага ад Расеi мы не чакаем», бо яна «не здольная дамаўляцца».

Канфлікт у Керчанскай пратоцы: што гэта было? 5 галоўных пытанняў і адказаў

Пра правакацыі

«Самая вялікая правакацыя, якой мы баімся – як мінімум акупацыя паўднёвых вобласцей, а як максімум – тое, што Расея будзе імкнуцца, каб Украіна спыніла свае існаванне», – адзначыў амбасадар.

Ён падкрэсліў: Украіна абрала курс на еўрапейскую і атлантычную інтэграцыю, а папулярныя сёння ва Украіне палітычныя партыі і рухі ніколі не выступяць з прарасейскай пазіцыі.

«Расею гэта моцна раздражняе», – канстатаваў амбасадар.

Пра абмежаванні для замежных грамадзянаў

Каментуючы сітуацыю з расейцамі, якіх днямі вярнулі з кіеўскага аэрапорту ў Менск, спадар Кізім адзначыў:

«Калі чалавек на мяжы не можа патлумачыць, навошта ён прыехаў – гэта выклікае пытанні ў памежнай службы, наколькі ён шчыры. Наколькі я разумею, гэтыя расейцы не змаглі назваць прычыну. У расейцаў увогуле праблема – у постсавецкіх краінах яны адчуваюць сябе як гаспадары, а не як госці», – распавёў амбасадар, дадаўшы, што не звязвае інцыдэнт з увядзеннем ваеннага становішча.

Што тычыцца зменаў у правілах уезду беларусаў ва Украіну, у тым ліку ў Чарнігаўскую вобласць, дзе абвешчана ваеннае становішча, то іх пакуль не варта чакаць. Як распавёў амбасадар, магчымы больш пільны дагляд асобаў і рэчаў на мяжы, але ніякіх дадатковых дакументаў для яе перасячэнне не спатрэбіцца. Гэта значыць, беларускія грамадзяне змогуць без праблем наведаць Украіну на Каляды.

Ваеннае становішча ўва Украіне – з серады

Пра рэакцыю Беларусі

На пытанне Belsat.eu пра тое, чаму, на думку амбасадара, беларускі бок дагэтуль не пракаментаваў сітуацыю ў Керчанскай пратоцы, Ігар Кізім адказаў:

«Гэта пытанне да кіраўніцтва Беларусі. Я не магу каментаваць. Адзінае, я магу сказаць, што адразу пасля інцыдэнту я праінфармаваў МЗС Беларусі пра пазіцыю МЗС Украіны з гэтай нагоды. І папрасіў МЗС Беларусі ўлічваць нашую пазіцыю пры ацэнцы сітуацыі, якая адбылася ў Керчанскай пратоцы. Усё астатняе – рашэнне беларускага боку, як каментаваць, як не каментаваць, у якім кантэксце каментаваць».

Амбасадар лічыць, што ў беларускага боку «ёсць памяркоўнасць, якая дапаможа зрабіць слушныя высновы» пра сітуацыю ў Керчанскай пратоцы.

«Бо трэба ж паглядзець на рэакцыю свету, трэба паглядзець на рэакцыю суседзяў і г.д. Таму я мяркую, што, хутчэй за ўсё, цяпер адбываецца выпрацоўка пазіцыі, якая будзе агучана. Таму – чакаем. Няма адказу – гэта таксама адказ, няма каментара – гэта таксама каментар. У дыпламатычнай практыцы так прынята».

Прэзідэнт Польшчы: Мы далучымся да ініцыятывы ўвесці санкцыі супраць Расеі, калі яна будзе

Нагадаем, 25 лістапада тры ўкраінскія караблі з ужываннем зброі захапіў расейскі спецназ у раёне Керчанскай пратоцы. Паводле ўкраінскіх медыяў, агулам Расея ўзяла ў палон 24 маракоў, 6 з іх параненыя. ФСБ сцвярджае, што ўкраінскія караблі парушылі расейскую мяжу, бо не падавалі заяўкі на праход у праліве. Украіна кажа, што папярэджвала аб праходзе судоў, але не атрымала адказу.

26 лістапада Рада нацыянальнай бяспекі і абароны прапанавала ўвесці ваеннае становішча ва Украіне. Прэзідэнт Пятро Парашэнка падпісаў указ, паводле якога ваеннае становішча ўводзіцца на 30 дзён ад серады, 28 лістапада. Пры гэтым выбары па-ранейшаму прызначаныя на 31 сакавіка 2019 года.

У панядзелак увечары, 26 лістапада, 276 дэпутатаў Вярхоўнай Рады прагаласавалі за ўвядзенне ваеннага становішча. Яно пачне дзейнічаць ад 9-й раніцы 28 лістапада і распаўсюдзіцца на 10 вобласцяў Украіны, у тым ліку Чарнігаўскую, што мяжуе з Беларуссю.

Спецвыданне «Студыі Белсат». Ва Украіне ўводзіцца ваеннае становішча

КА, Belsat.eu

Глядзі таксама
Каментары