Уладзімір Пуцін і Аляксандр Лукашэнка на сустрэчы 13 лютага ў Сочы абмяркуюць будучыню Саюзнай дзяржавы. Пра гэта 6 лютага на прэс-канферэнцыі паведаміў спецпрадстаўнік прэзідэнта Расеі па гандлёва-эканамічнай супрацы з Беларуссю, амбасадар Расеі ў Беларусі Міхаіл Бабіч.
«Парадак, безумоўна, закране ўвесь спектр расейска-беларускіх адносінаў. Будуць разгледжаныя ўсе праблемныя пытанні, якія хвалююць абодва бакі», – адзначыў Бабіч.
Расейскі амбасадар таксама дадаў, што падчас сустрэчы кіраўнікі дзяржаваў паразмаўляюць пра «першасныя вынікі і падыходы працоўных групаў, якія ўзначальваюць міністры эканомікі, у пытаннях далейшай інтэграцыі і рэалізацыі саюзнай дамовы». Бабіч удакладніў, што першае супольнае пасяджэнне расейска-беларускай працоўнай групы ў пытаннях паглыблення інтэграцыі адбудзецца пасля сустрэчы Пуціна і Лукашэнкі.
Прэзідэнты Расеі і Беларусі «паставяць ужо больш канкрэтныя задачы па рэалізацыі ў тым ці іншым фармаце нашых інтэграцыйных магчымасцяў».
