У Менску АМАП разбіў пратэстоўцу галаву. Яшчэ як мінімум адзін мужчына пацярпеў у выніку тарану аўтазака.
Сілавікі ў Менску пачалі штурм барыкад, якія выбудавалі на праспекце мітынгоўцы. У той бок накіравалася калона спецтэхнікі, уключылі вадамёты, выкарыстоўваюцца святлашумавыя гранаты.
У людзей на Кальварыйскай стралялі гумовымі кулямі. Страляюць па балконах жылых дамоў.
Таксама карэспандэнты паведамляюць, што АМАП кідае гранаты проста ў людзей.
Нашыя журналісты паведамляюць пра непрытомнага мужчыну каля стэлы.
Onliner.by паведамляе як мінімум пра трох пацярпелых на Машэрава.
Затрыманні адбываліся на Нямізе. На мосце каля Нямігі вайскоўцы выхопвалі людзей з натоўпу, запіхвалі ў бусы. Людзі крычаць «Міліцыя з народам».
Ёсць непацверджаная інфармацыя, што АМАП праламаў галаву дзяўчыне ў Менску.
З’явілася дапоўненая інфармацыя ад відавочца, які знаходзіцца каля стэлы: адной дзяўчыне прабіла скулу, была дзірка, у хлопца было мінімум 5 ран на грудзі.
Затрыманні адбываюцца на вуліцы Леніна, затрымліваюць байцы ўнутраных войскаў. У самым цэнтры ідуць затрыманні. Чутны выбухі гранат.
Афіцыйна паведамляюць, што пацярпеў адзін праваахоўнік.
