Па стане на 13 траўня ў Беларусі было зарэгістравана 25 825 выпадкаў інфікавання каронавірусам, паведамляе Мінздароўя.
12 траўня Мінздароўя Беларусі паведамляла пра 24 873 выпадкі заражэння каронавіруснай інфекцыяй. Прырост за апошнія содні – 952 выпадкі інфікавання.
«У Беларусі праведзена 296 380 тэстаў. За ўвесь перыяд распаўсюджвання інфекцыі на тэрыторыі краіны памерлі 146 пацыентаў з шэрагам хранічных захворванняў з выяўленай каронавіруснай інфекцыяй», – паведамляе Telegram-канал Мінздароўя Беларусі.
12 траўня Аляксандр Лукашэнка падчас нарады са сваёй Адміністрацыяй і чальцамі ўраду заявіў, што ў Беларусі зафіксавана зніжэнне колькасці захворванняў на пнеўманію. Кіраўнік Беларусі таксама адзначыў, што росту выпадкаў інфекцыйных захворванняў пасля правядзення параду 9 траўня не зафіксавана.
Праўда, Аляксандр Лукашэнка не ўзгадаў пра інкубацыйны перыяд новага каронавіруса, які складае 14 дзён. Рост захворванняў можа быць зафіксаваны пад канец траўня.
ЮВ belsat.eu
