Другі дзень дыялогу працоўнай групы. Пасля амаль паўтара месяца пратэстаў прадпрымальнікаў па ўсёй краіне ўлады, здавалася б, урэшце выказалі гатовасць да перамоваў.
«Будзе працаваць адваротная сувязь з грамадскасцю, з прадпрымальніцкім асяроддзем. Пасля ўжо распрацоўнік праекту нарматыўна-прававога акту будзе акумуляваць гэтыя ўсе прапановы і заўвагі ды ацэньваць з гледзішча мэтазгоднасці і магчымасці ўліку прапановаў». – распавядае Алег Сліжэўскі, міністр юстыцыі.
І кіраўнік Беларусі, які днямі называў прадпрымальнікаў злодзеямі ды вінаваціў у разбурэнні лёгкай прамысловасці краіны, сёння на паседжанні калегіі Следчага камітэту выказваўся ў зусім іншым ключы і наказваў праваахоўнікам не ствараць перашкодаў працы айчыннага бізнесу.
«Залішняю заўзятасцю мы тут не толькі не дапаможам – можам зрабіць горш. Галоўнае – гэта эканоміка. Мы не мусім дзеля нейкіх там паказнікаў ды нават гучных справаў «душыць» прадпрымальнікаў, маю на ўвазе і дзяржаўную, і прыватную форму ўласнасці, якія кормяць краіну», – нечакана даводзіць Аляксандр Лукашэнка, кіраўнік Беларусі.
Нягледзячы на такую змену рыторыкі, заўчорашнія «злодзеі» ды сённяшнія «кармільцы» краіны перад паседжаннем працоўнай групы ў Міністэрстве эканомікі падкрэслілі, што ранейшыя словы Лукашэнкі не пакінулі абыякавымі шмат каго з тых, хто ўжо мог быць гатовы пагадзіцца на дыялог.
«Мы здымаем з сябе ўсялякую адказнасць за ўстрыманне прадпрымальнікаў перад акцыямі пратэсту, бо я лічу, што пасля заяваў прэзідэнта пра тое, што прадпрымальнікі бандыты – размаўляць хіба няма пра што», – кажа Анатоль Змітровіч, удзельнік працоўнай групы пры Міністэрства эканомікі.
Тыя ж, хто вырашыў з пратэстам пачакаць патлумачылі «Белсату», што дыялог – шанец не толькі для ІП, але і для ўладаў.
«Калі перамовы ідуць – гарматы маўчаць. Нашая мэта была – быць пачутымі, і мы ў тым ліку з прычыны гэтага і падалі заяўку на мітынг. Бо з намі ніхто не хацеў размаўляць. Мы дасягнулі перамоваў, і лагічна было зрабіць выснову, што на гэтым этапе патрэба мітынгу адпадае. Мы яго правядзем у любы іншы дзень і час», – тлумачыць Андрэй Шумчанка, старшыня грамадскага абʼяднання «Перспектыва».
Тым часам доўгачаканыя перамовы на гэты момант не прывялі фактычна ні да чаго. Замест адмены ці змянення ўказу №222 – пра неабходнасць сертыфікацыі тавараў лёгкай прамысловасці – прадпрымальнікам у Міністэрства эканомікі запрапанавалі толькі зменшыць штрафы за гандаль таварам без дакументаў з 500 базавых велічыняў да 300. Для тых, хто і без гэтых размоваў збіраўся на вулічны пратэст, усё стала толькі больш відавочнае.
«За нашымі спінамі сем’і, і нам няма куды саступаць. Як паказала практыка сходаў – прадпрымальнікі загнаныя ў кут, і яны, на жаль, гатовыя адстойваць свае інтарэсы нават на плошчах», – зазначае Ірына Яскевіч, прафсаюз прадпрымальнікаў «Разам».
Сотні віцебскіх ІП заклікалі калегаў выйсці на ўсебеларускі сход прадпрымальнікаў у Менску ў панядзелак. Паводле спадарыні Яскевіч, месца пратэсту яшчэ не вызначанае. Адное з магчымых месцаў збору – плошча каля чыгуначнага вакзалу сталіцы.
Усевалад Шлыкаў, «Белсату»
