Прэзідэнт Азербайджана Ільхам Аліеў і прэм’ер-міністр Арменіі Нікол Пашыньян правялі першыя афіцыйныя перамовы, галоўным вынікам якіх стала гатовасць бакоў працягваць прамы дыялог па мірнаму ўрэгуляванню нагорна-карабахскага канфлікту.
Сустрэча, якая праходзіла ў гатэлі Bristol, дзе спыняліся манархі, прэзідэнты і кампазітары, пачалася ў прысутнасці кіраўнікоў МЗС дзвюх краін Эльмара Мамедʼярава і Заграба Мнацаканяна, а таксама сустаршыняў менскай групы АБСЕ Ігара Папова (Расея), Стэфана Вісконці (Францыя) і Эндру Шафёра (ЗША). Пасля лідары гутарылі сам-насам, праз тры гадзіны гутарка набыла пашыраны фармат, і праз паўгадзіны раўнд завяршыўся.
Пашыньян, ужо сядаючы ў машыну, заявіў карэспандэнту ТАСС, што «сустрэча прайшла нармальна». Аліеў на аналагічную просьбу заклікаў дачакацца заявы сустаршыняў. Лідары абяцанне стрымалі і не каментавалі вынікі да публікацыі заявы АБСЕ.
Ад дзвярэй да дзвярэй
Візіты кіраўніка Азербайджана і прэмʼера Арменіі ў Аўстрыю працягнуліся асобнымі размовамі з федэральным канцлерам Себасцьянам Курцам і прэзідэнтам краіны Александэрам ван дэр Бэленам. Ведамства канцлера і канцылярыя прэзідэнта знаходзяцца насупраць праз дарогу, прамежак паміж сустрэчамі складаў меней за дзесяць хвілінаў. Пакуль Аліеў быў у аўстрыйскага прэзідэнта, сустаршыні апублікавалі заяву.
Важнасць мірных крокаў
Па словах сустаршыняў, перамовы прайшлі ў канструктыўным ключы.
«Абодва лідары падкрэслілі важнасць стварэння абстаноўкі, якая спрыяе міру, і прыняццю далейшых канкрэтных і адчувальных крокаў у працэсе перамоваў для знаходжання мірнага вырашэння канфлікту», – адзначаецца ў дакуменце.
Акрамя таго, Аліеў і Пашыньян дамовіліся пра гуманітарныя меры па ўрэгуляванні нагорна-карабахскага канфлікту, пацвердзілі неабходнасць спынення агню і ўдасканалення механізму наўпроставай сувязі.
«Прэмʼер-міністр і прэзідэнт далі ўказанні сваім міністрам сустрэцца з сустаршынямі ў найбліжэйшай будучыні. Яны таксама пагадзіліся працягнуць прамы дыялог», – гаворыцца ў заяве.
Фармат ранейшы
Прэзідэнт Азербайджану пасля сустрэчы з Ван дэр Бэленам пракаментаваў ТАСС вынікі перамоваў. Паводле яго словаў, галоўнае – што фармат застаецца нязменным. Гэта значыць, што ініцыятыва Ерэвана пра працягванні непрызнання Нагорна-карабахскай рэспублікі да кансультацыяў не атрымала развіцця і ўзгаднення.
«Перамоўны працэс таксама павінен быць падтрыманы гуманітарнымі акцыямі. Важным зʼяўляецца тое, што фармат перамоваў застаўся нязменным, перамовы вядуцца паміж Арменіяй і Азербайджанам, як гэта і было многія гады. Перамоўны працэс атрымаў новы імпульс, мы вельмі пазітыўна ацанілі заяву сустаршыняў менскай групы АБСЭ ад 9 сакавіка, у якой адзначаецца, што змяненне перамоўнага фармату можа быць толькі са згоды двух бакоў», – сказаў прэзідэнт Азербайджану Аліеў.
Паводле яго словаў, Баку згоду на гэта не даваў.
«Мы вярнуліся да сітуацыі, калі трэба працягваць весці субстантыўныя перамовы. Агучана даручэнне кіраўнікам МЗС, якія, хутчэй за ўсё, у бліжэйшы час сустрэнуцца для працягу перамоўнага працэсу», – звярнуў увагу Аліеў.
«На першым месцы стаіць пытанне дэакупацыі міжнародна прызнаных тэрыторый Азербайджану ў межах міжнароднага права, Хельсінкскага заключнага акту і чатырох рэзалюцыяў СБ ААН, якія патрабуюць неадкладнага і безумоўнага вываду армянскіх сіл з акупаваных тэрыторый», – акрэсліў найбольш важныя ўмовы для Азербайджану Аліеў.
Пачатак абмеркавання праблем
Пашыньян на сустрэчы з армянскай дыяспарай у пасольстве Арменіі таксама даў станоўчую ацэнку перамоваў, аднак заўважыў, што прарыву або эвалюцыі не было.
«Галоўнае – што бакі пачалі размаўляць пра праблемы», – заявіў прэмʼер Пашыньян.
СК belsat.eu
