Самы моцны за дзесяцігоддзі землятрус абрынуўся 26 лістапада на Албанію. У выніку землятрусу абваліліся прынамсі два будынкі, пад заваламі могуць знаходзіцца людзі, паведамляе Reuters.
Землятрус сілай 6,4 бала адбыўся каля 4 гадзін раніцы па мясцовым часе. Яго эпіцэнтр знаходзіўся за 30 км на захад ад сталіцы краіны Тыраны.
Загінуў прынамсі адзін чалавек, які, запанікаваўшы, выскачыў з будынку ў горадзе Курбін.
Паведамляецца пра разбурэнні ў Тыране і ў партовым горадзе Дурэс. Ёсць пацярпелыя, некаторыя з іх шпіталізаваныя.
Некалькі меншых падземных штуршкоў былі зарэгістраваныя за гадзіну да галоўнага землятрусу, які таксама адчуваўся ў італьянскай вобласці Апуліі.
Гэта не першы землятрус у Албаніі за апошнія месяцы. Папярэдні сілай 5,6 бала скалыхнуў краіну 21 верасня. Тады ўлады заяўлялі, што ён быў самым моцным за апошнія 30 гадоў.
МГ belsat.eu