Расейскі актор Міхаіл Яфрэмаў папрасіў прабачэння ў сваякоў загінулага Сяргея Захарава. Актор таксама заявіў, што гатовы аказаць неабходную дапамогу. Відэазварот Яфрэмаў апублікаваў на YouTube-канале «Грамадзянін паэт».
Актор Міхаіл Яфрэмаў напісаў відэазварот у якім папрасіў прабачэння ў родных загінулага Сяргея Захарава.
«Ужо чатыры дні прайшло з гэтага праклятага панядзелку. Я не ведаў, што сказаць, ды і цяпер не ведаю. Не ведаю, як і якімі словамі прасіць прабачэння ў сям’і Сяргея Захарава. Але я ўсё роўна прашу, хоць ведаю, што не даруюць. Я, вядома, дапамагу ім усімі сродкамі, калі прымуць», – сказаў Міхаіл Яфрэмаў.
Актор таксама дадаў, што прапаноўвае сямʼі загінулага грошы, і гэта «не спроба адкупіцца».
У сваю чаргу сямʼя Захарава не прыняла прабачэнні і адмовілася ад грошай.
«Прабачэнні сямʼёй дэ-факта не прынятыя. Калі спадар Яфрэмаў хоча зрабіць нейкі ўклад у барацьбу з пʼянствам за рулём – гэта яго асабістая ініцыятыва, але пра мірнае ўрэгуляванне казаць позна, і грашовую кампенсацыю, пра якую вялося ў відэа, мы не прымем», – працытаваў брата загінулага кіроўцы адвакат сямʼі Аляксандр Дабравінскі, паведамляе РБК.
Міхаіл Яфрэмаў цяпер пад хатнім арыштам. Артыкул, у межах якога супраць яго распачатая справа, прадугледжвае ад пяці да 12 гадоў пазбаўлення волі.
8 чэрвеня Міхаіл Яфрэмаў спрычыніўся да ДТЗ у цэнтры Масквы. Ягоны аўтамабіль вылецеў на сустрэчную паласу і ўрэзаўся ў іншы аўтамабіль. Кіроўца патрапіў у шпіталь. Пазней Сяргей Захараў памёр. Вядома, што на момант здарэння актор знаходзіўся ў стане алкагольнага і наркатычнага апʼянення.
Міхаіл Яфрэмаў – адзін з найбольш знакамітых расейскіх артыстаў. Вядомы ён і тым, што не падтрымлівае афіцыйную палітыку Крамля.
СК belsat.eu