«Агрэсар проста здохне»: Пуцін на «Валдаі» распавёў пра вонкавую і ўнутраную палітыку Крамля


SOCHI, RUSSIA – OCTOBER 18, 2018: Russia's President Vladimir Putin at an annual meeting of the Valdai Discussion Club. Vladimir Smirnov/TASS

Уладзімір Пуцін выступіў на пленарнай сесіі Міжнароднага дыскусійнага клубу «Валдай», які адбываўся ў Сочы. У мерапрыемстве прынялі ўдзел расейскія і замежныя спецыялісты ў галіне міжнародных адносінаў.

Тэма пленарнай сесіі юбілейнага XV пасяджэння Міжнароднага дыскусійнага клубу – «Свет, у якім мы будзем жыць: стабільнасць і развіццё ў ХХI стагоддзі«. З выступаў Пуціна на «Валдаі» можна зрабіць высновы пра асноўныя напрамкі расейскай вонкавай палітыкі на бліжэйшы час.

Ядравы ўдар супраць Расеі стане смяротным для агрэсара

Уладзімір Пуцін заявіў, што ў выпадку ядравага ўдару па Расеі магчымыя агрэсары «проста здохнуць». Па словах кіраўніка дзяржавы, Расея ніколі не стане наносіць прэвентыўны ядравы ўдар, а правядзе атаку толькі ў выпадку меркаванай агрэсіі, пераканаўшыся, што яна мела месца.

«Агрэсар павінен ведаць, што мы як пакутнікі трапім у рай, а агрэсар проста здохне, не паспеўшы раскаяцца», – заявіў Пуцін.

Пасля гэтага адказу вядоўца задаў Пуціну пытанне, ці не страшна яму? Кіраўнік Крамля перапытаў, чаму яму павінна быць страшна. Вядоўца патлумачыў, што прэзідэнт Расеі – «адзін з трох чалавек, на якім ляжыць адказнасць за мір».

«Не», – адказаў Пуцін.

Ён растлумачыў, што страх – гэта адваротны бок натуральнага для любога чалавека інстынкту самазахавання.

«Калі ўзяўся за нейкую працу, трэба загадзя усвядомліваць з чым яна звязана», – адзначыў Пуцін.

Пра стасункі з ЗША і Трампам

Уладзімір Пуцін прызнаўся, што стасункі з амерыканскім лідарам не заўсёды бываюць добрымі. Па словах расейскага прэзідэнта, Дональд Трамп жадае стабілізацыі адносінаў з Расеяй. Пры гэтым Пуцін падкрэсліў, што з Трампам у іх склаўся нармальны прафесійны дыялог. Акрамя таго, амерыканскі прэзідэнт чуе аргументы суразмоўцы, падкрэсліў Пуцін.

«Ён можа не згаджацца – я таксама не згаджаюся… Гэта нармальна, дыскусія – сябар партнёраў», – дадаў расейскі прэзідэнт.

Працягваючы тэму, Уладзімір Пуцін распавёў анекдот.

«Ёсць такі жарт, стары, з барадой. Пытанне: як вы расслабляецеся? Адказ: я не напружваюся », – пажартаваў Пуцін.

Ён растлумачыў, што ў адносінах з ЗША Расея «нікога не напружвае» у міжнародных адносінах.

«Тое ж самае датычыцца напружання ў міжнародных справах. Мы не напружваем нікога, мы не ствараем ніякіх праблемаў», – сказаў Пуцін.

Пра сітуацыю ва Украіне

На пытанне ўкраінскага журналіста аб тым, калі будзе вырашана праблема на ўсходзе Украіны, Уладзімір Пуцін стаў вінаваціць улады Кіева ў антыдзяржаўнай палітыцы.

«Палітыка ўкраінскіх уладаў антыдзяржаўная, такім чынам раней дзейнічалі грузінскія ўлады, спадзяюся, што гэтага ў далейшым не адбудзецца. Зараз Кіеў гандлюе русафобіяй. Больш там нічога няма і ім Захад даруе многа. Таму нам трэба дачакацца выбараў і выбудоўваць новыя адносіны з новай уладай у Кіеве, таму што мы да гэтага гатовыя і гэтага жадаем», – падсумаваў Уладзімір Пуцін.

Пра трагедыю ў Керчы

Згодна меркавання Пуціна трагедыя ў Керчы стала следствам недахопу кантэнту для моладзі ў інтэрнэце. Уладзімір Пуцін упэўнены, што трагедыя ў Керчы – вынік глабалізацыі, «уключаючы сацыяльныя сеткі».

«Маладыя людзі з няўстойлівай псіхікай ствараюць сабе ілжэгерояў. Гэта значыць, што мы не ствараем патрэбнага, цікавага і карыснага кантэнту. Гэта і прыводзіць да трагедый», – сказаў Пуцін.

Пры гэтым прэзідэнт дадаў, што сапраўднаму гераізму ўсё ж ёсць месца ў нашым жыцці.

Пуцін пра Крым

Пуцін выказаў меркаванне, што ўсе спробы аспрэчыць прыналежнасць Крыму заходзяць у тупік. Крым стаў расейскім «не таму што, мы штосьці «хапнулі».

»Дэмакратыя як правяраецца? З дапамогай рэферэндумаў, выбараў і гэтак далей. Людзі прыйшлі ў Крыме на рэферэндум і прагаласавалі…. Нагадаю ў соты раз, у Косава не было рэферэндуму. Там толькі парламент прагаласаваў за незалежнасць і ўсё», – заявіў Пуцін.

CК, belsat.eu

Глядзі таксама
Каментары