50 гадоў таму, 20 ліпеня 1969 года, амерыканскія астранаўты ўпершыню ў гісторыі здзейснілі высадку на іншую планету – спадарожнік Зямлі Месяц. З нагоды 50-годдзя першай пасадкі людзей на Месяц амерыканская Нацыянальная адміністрацыя аэранаўтыкі і космасу (НАСА) апублікавала здымкі тых знакавых падзеяў.
У 20:17:39, паводле сусветнага каардынаванага часу, камандзір карабля «Апалон-11» Ніл Армстранг і пілот Баз Олдрын пасадзілі месяцовы модуль у паўднёва-заходнім раёне Мора Спакою. Яны заставаліся на паверхні Месяца больш за 21 гадзіну, пакуль пілот каманднага модулю Майкл Колінз чакаў іх на калямесяцовай арбіце.
21 ліпеня на паверхню месяцу ступіў Ніл Армстранг, да якога праз 15 хвілінаў далучыўся Баз Олдрын.
«Гэта адзін маленькі крок для чалавека і вялізны скачок для чалавецтва», – гэтыя словы Ніла Армстранга ўвайшлі ў гісторыю.
Выхад на месяцовую паверхню працягваўся 2 гадзіны 31 хвіліну 40 секунд. Астранаўты ўсталявалі ў месцы пасадкі сцяг ЗША, размясцілі камплект навуковых прыбораў і сабралі 21,55 кг узораў месяцовага грунту, якія былі дастаўленыя на Зямлю.
Людзі яшчэ пяць разоў высаджваліся на месяц. Апошняя высадка адбылася ў 1972 годзе, пасля чаго праграма «Апалон» праз яе дарагавізну была зачыненая.
МГ belsat.eu