Адзін з кіраўнікоў Менскай абласной дзіцячай клінічнай больніцы даваў будаўнікам працу за хабар
Следчы камітэт завяршыў расследаванне крымінальнай справы былога намесніка галоўнага лекара Менскай абласной дзіцячай клінічнай больніцы, якога затрымалі за атрыманне хабару ў студзені. Паводле следства, ён два з паловай гады карыстаўся сваёй пасадаў у мэтах прыбытку.
З траўня 2015 года па снежань 2017 гады мужчына неаднаразова браў хабар ад будаўнічых арганізацыяў, прыцягваючы іх у адказ да выканання рамонтаў у шпіталі.
«Ён атрымліваў узнагароды за заключэнне з будаўнічымі арганізацыямі дамоваў, станоўчую прыёмку выкананых работ і своечасовую аплату», – паведаміла прадстаўніца СК Таццяна Беланогая.
Следства сабрала 24 доказы фактаў перадачы лекару грошай на агульную суму больш за Br 46 тысячаў. Мужчыну прад’явілі абвінавачванне па частках 1 і 2 артыкулу 430 Крымінальнага кодэксу («атрыманне хабару, у тым ліку паўторна і буйным памеры»). Яму пагражае да дзесяці гадоў турмы і канфіскацыя маёмасці.
Лекар знаходзіцца пад вартай, на ягоную маёмасць наклалі арышт.
ДД
