28 траўня працаўнік ТАА «Лігмод» упаў з вышыні 12 метраў падчас выконвання працаў на заводзе «Нафтан».
Сяргей Еўтушык, намеснік гендырэктара кампаніі «Нафтан» у пытаннях кадраў і ідэалагічнай працы пацвердзіў гэтую інфармацыю.
«Здарэнне сапраўды мела месца. З вышыні ўпаў працаўнік нашага падрадчыка», – распавёў Belsat.eu прадстаўнік «Нафтану».
Атрымаць каментар у ТАА «Лігмод» не ўдалося.
«Мы не каментуем гэтую інфармацыю», – паведамілі Belsat.eu у кампаніі «Лігмод».
Паводле неафіцыйнай інфармацыі, цягам апошняга часу было прынамсі тры падобных здарэнні з працаўнікамі ТАА «Лігмод».
«Гэта трэцяе падзенне на «Лігмодзе». Адзін інвалід. Адзін труп. А з апошнім не вядома», – паведаміла блогеру NEXTA ананімная крыніца.
Паводле крыніцы, мужчына, які ўпаў на «Нафтане», знаходзіцца ў крытычным стане. Ён упаў з вышыні падчас абслугоўвання ўстаноўкі рэгенерацыі сернай кіслаты.
ЮВ, belsat.eu