9 верасня ў кватэры юрыста штабу Віктара Бабарыкі і адваката Марыі Калеснікавай Іллі Салея прайшоў вобшук, а яго самога затрымалі ў якасці падазраванага па крымінальнай справе, піша афіцыйны Тэлеграм-канал Віктара Бабарыкі.
Ілля Салей – юрыст адвакацкага бюро Borovtsov & Salei. Быў адным з адвакатаў Віктара Бабарыкі.
Cправа на Салея заведзеная паводле артыкулу 361 Крымінальнага кодэксу: Заклікі да дзеянняў, скіраваныя на прычыненне шкоды нацыянальнай бяспецы Рэспублікі Беларусь. Па гэтаму артыкулу яму пагражае да 3 гадоў пазбаўлення волі.
Сёння раніцаю таксама быў затрыманы чалец прэзідыуму Каардынацыйнай рады юрыст Максім Знак.
Стала вядома, што Марыя Калеснікава ўтрымліваецца ў СІЗА № 1 на Валадарскага, яна праходзіць падазраванай па справе аб спробе захопу ўлады. Імаверна, пакуль яна адзіная з чальцоў КР у такім статусе.
- 20 жніўня Генеральная пракуратура распачала справу паводле артыкулу 361 (заклікі да захопу ўлады) Крымінальнага кодэксу, які пагражае тэрмінам зняволення да 5 гадоў.
- «Стварэнне і дзейнасць Каардынацыйнай рады накіраваныя на захоп дзяржаўнай улады, а таксама на прычыненне шкоды нацыянальнай бяспецы Рэспублікі Беларусі. На падставе гэтага факту заведзеная крымінальная справа паводле артыкулу 361 Крымінальнага кодэксу», – заявіў генеральны пракурор.
