Кіраўнік Беларусі, наведваючы 2 верасня менскую сярэднюю школу № 93, расказаў пра будучыя змены законаў, якія датычаць звароту наркотыкаў.
Аляксандр Лукашэнка адзначыў, што менавіта з ягонай ініцыятывы «законы прынялі вельмі жорсткія». Разам з тым ён прызнаў, што «перагнулі», паведамілі ў Адміністрацыі кіраўніка дзяржавы.
«Той, хто наркотыкі ўжывае, – хворы чалавек. І я лічыў, што іх трэба выхоўваць працай – у калоніі», – сказаў Лукашэнка.
Зараз ён разглядае магчымасць сустрэцца з бацькамі асуджаных за парушэнне антынаркатычнага заканадаўства, «але ім жа трэба нешта сказаць». Таму ўлады раздумваюць, што зрабіць.
«Па антынаркатычным заканадаўстве мы пераканаліся, што мы жорстка гэта зрабілі. Адпусцім, але трошкі», – дадаў кіраўнік дзяржавы.
Пры гэтым Лукашэнка адзначыў, што «тым, хто сюды прывозіць, распаўсюджвае наркотыкі, ніякай літасці не будзе».
МГ belsat.eu