Сустрэча лідараў ЗША і КНДР скончылася раней запланаванага часу. Бакі адмянілі цырымонію падпісання сумеснага пагаднення і ланч. Саміт завяршыўся без якіх-кольвек дамоўленасцяў, паведаміў Белы дом.
Палітыкі абмяркоўвалі пытанне дэнуклеарызацыі Карэйскага паўвострава. «Цяпер пагадненне не было дасягнутае, але дэлегацыі дзвюх краін з нецярпеннем чакаюць сустрэчы ў будучыні», – заявіла прэс-сакратар Белага дома Сара Сандэрс.
«Шчыра кажучы, я думаю, што мы станем вельмі добрымі сябрамі з Кімам, – адзначыў Трамп. – У іх [Паўночнай Карэі. – Заўв. Belsat.eu] велізарны патэнцыял, але гаворка ішла пра санкцыі […] яны былі гатовыя пайсці на саступкі, але не на тыя, якія мы хацелі».
Другі саміт ЗША – КНДР праходзіў у в’етнамскім Ханоі, а першы адбыўся на сінгапурскім востраве Сентоса.
ЮВ, belsat.eu