«Адмовіць ва ўзбуджэнні крымінальнай справы». Ахвяры міліцэйскага гвалту пачалі атрымоўваць адказы на заявы ў СК
5 лістапада жыхар Лагойску Юрый Крывашэй атрымаў паведамленне са Следчага камітэту, што прынята рашэнне аб адмове ва ўзбуджэнні крымінальнай справы па факту прычынення яму цялесных пашкоджанняў 11 жніўня.
«Чаму мне быць выключэннем?»
«Сёння раніцай я пайшоў у Следчы камітэт, каб атрымаць хоць якое тлумачэнне. Я хацеў азнаёміцца з пастановай аб адмове ва ўзбуджэнні крымінальнай справы па факту свайго збіцця. Але следчага на месцы не апынулася, і я не змог гэтага зрабіць. Напэўна, паспрабую падысці да іх у іншы час», – гаворыць Юрый Крывашэй.
Па словах мужчыны, ён і не чакаў, што нехта будзе разбірацца з вінаватымі.
«Нават яшчэ перад тым, як адчыніць ліст, я ведаў ягоны змест. Проста не было ні аднаго выпадку ўзбуджэння крымінальнай справы супраць супрацоўнікаў міліцыі, якія збівалі людзей пасля выбараў. Чаму мне быць выключэннем? Улічваючы, што зараз адбываецца ў Беларусі, гэта цалкам прадказальна», – тлумачыць Юрый.
Юрый распавёў пра адмову ва ўзбуджэнні крымінальнай справы ў сваіх сацыяльных сетках, і шмат людзей прапанавалі яму дапамогу ў напісанні скаргі на пастанову Следчага камітэту. Юрый не ведае, наколькі гэта дапаможа і ўвогуле ці мэтазгодна, але ўсё ж такі збіраецца абскарджваць рашэнне СК.
«Яны збівалі моўчкі»
Юрыя Крывашэя затрымалі 11 жніўня. Супрацоўнікі ДАІ спынілі аўтамабіль, у якім ён ехаў у краму з жонкай і дзіцём, каб нібыта спраўдзіць дакументы. А ў гэты час пад’ехаў мікрааўтобус з людзьмі ў чорнай форме і ў масках. Юрыя зацягнулі ў гэты аўтобус.
«У мікрааўтобусе мяне пачалі збіваць дубінкамі. Яны збівалі моўчкі, напэўна, каб я іх не пазнаў па голасу. Таму я думаю, што гэта былі жыхары Лагойска. Білі па нагах, руках, плячах», – узгадвае Юрый.
Пасля збіцця мужчыну прывезлі ў Лагойскі РАУС, дзе на яго склалі пратакол за непадпарадкаванне супрацоўнікам міліцыі паводле арт. 23.4 КаАП.
«Ніякай медычнай дапамогі мне ніхто не аказаў. У РАУСе мяне проста паклалі тварам у халодную плітку, і так я правёў каля трох гадзін. Пасля даставілі ў Лагойскі ізалятар», – узгадвае Юрый.
Чаму затрымалі, невядома
Суд прысудзіў Крывашэю 10 содняў арышту, з якіх ён адбыў пяць. Жыхары ягоных родных Плешчаніц пачалі выходзіць на плошчу і патрабаваць яго вызвалення, і 15 жніўня Юрыя сапраўды вызвалілі – без тлумачэнняў і без аніякіх папер.
16 жніўня Юрый зафіксаваў свае траўмы ў Менскай абласной клінічнай больніцы. Адпаведна даведкі адтуль, у мужчыны былі: шматлікія ўшыбы, гематомы, кровападцёкі. Судова-медыцынская экспертыза, на якую Юрыя накіраваў Следчы камітэт, адбылася на наступны дзень, 17 жніўня, але з яе вынікамі Крывашэя не азнаёмілі.
Юрый дагэтуль не ведае рэальную прычыну свайго затрымання.
«Я быў адміністратарам тэлеграм-чату «ДАІ Лагойскі раён», магчыма, у гэтым прычына. Яшчэ ў Лагойскім РАУС намеснік начальніка сказаў мне, што я замінаю ім працаваць», – высоўвае сваю здагадку Юрый.
Свой арышт Юрый абскардзіў: суд Менскай вобласці замест 10 содняў арышту даў яму 5 содняў. Як раз столькі, колькі мужчына адседзеў у ізалятары.
З МНС у IT
Неабыякавыя людзі назвалі Юрыю некалькі прозвішчаў тых, хто яго збіваў. Але канкрэтных доказаў у мужчыны няма. Сам Юрый гэтых людзей не ведае, але кажа, што ў яго шмат знаёмых сярод супрацоўнікаў міліцыі. Паўтары гады таму ён працаў фотакарэспандэнтам у газеце «Родны край» і фатаграфаваў супрацоўнікаў міліцыі.
На момант затрымання Юрый працаваў у МНС. Звольніцца адтуль яго змусілі ў дзень затрымання – рапарт аб звальненні (па асабістаму жаданню кіраўніцтва МНС з Мінска) яму прывезлі прама ў Лагойскі РАУС 11 жніўня. Юрый падпісаў гэты рапарт. Цяпер ён працуе ў айці-кампаніі бізнэс-аналітыкам.
Вольга Васільева, Belsat.eu
