Адмова ад свабоды

Аляксандр
Фядута
паліткансультант

Чаму мітынг у падтрымку Лукашэнкі сабраўся толькі ў Менску

Ну, як сказаў бы Астап Бэндэр, спраўдзілася мара ідыёта. Улада вырашыла правесці мітынг у сваю падтрымку. Сабралі некалькі дзясяткаў тысяч (65 тыс. – падае МУС) лепшых, як гаварылася ў шварцаўскім «Драконе», людзей, для таго, як высветлілася, каб на пытанне, ці хочуць яны свабоды, яны адказалі:

– Не!

Дружна так адказалі. Калектыўны стрыптыз зладзілі. Не патрэбна ім Свабода. Не патрэбна – і ўсё тут.

А. Г. Лукашэнка выступае перад сваімі прыхільнікамі на мітынгу. 16 жніўня 2020 г. Менск, Беларусь. Фота: Ірына Арахоўская / Vot-tak.tv / Belsat.eu

А што трэба? Яны кажуць, што ім патрэбен мір. Уласна, яго ўсё яшчэ дзейная ўлада здольная забяспечыць адным росчыркам пяра міністра Караева, загнаўшы «тонтан-макутаў» з беларускага АМАПу ў казармы. Яна мір парушыла – яна хай яго і забяспечыць.

А вось са свабодай складаней. Улада сапраўды не разумее, навошта яна патрэбная. Памятаеце дыялог міністра прамысловасці з рабочым БелАЗа:

– У цябе праца ёсць? Вось, ідзі і працуй!

Маўляў, заткніся, раб, пакуль цябе на хлеб хапае. А свабода як праява пачуцця ўласнай годнасці? Не, не чулі.

І тут падумалася. Вось, з усёй краіны звезлі дзве тысячы чалавек. У цэнтр Менска. Але ж мітынгі за свабодныя і сумленныя выбары праходзяць па ўсёй краіне. І лагічна было б сабраць гэтакі «антымайдан» не адзін на ўсю краіну, а як раз у кожным горадзе, дзе мітынгуюць за адстаўку Лукашэнкі. Але логікі няма. А чаму, уласна?

Удзельнікі мітынгу ў падтрымку А. Р. Лукашэнкі пад Домам урада. 16 жніўня, 2020 г. Менск, Беларусь. Фота: Ірына Арахоўская / Vot-tak.tv / Belsat.eu

Таму што чым меншы горад, тым цяжэй схавацца. Тым цяжэй сабраць неабходную колькасць людзей – нават тых жа бюджэтнікаў, – каб правесці мітынг у абарону фальсіфікацый. У Жодзіне, напрыклад, ці ў Салігорску, колькі вы набярэце такіх? Каб раўлі, ўгаворвалі:

– Бацька ты наш родны! Застанься! Не патрэбна нам свабода!

Бо там усе адзін аднаго ведаюць. Могуць потым і спытаць у цябе:

– А чаго ж ты, краса ненаглядная, за мяне ад свабоды адмовілася? Чаму прасіла застацца і далей фальсіфікаваць выбары?

Наталля Качанава на мітынгу ў падтрымку Лукашэнкі перад Домам ураду. 16 жніўня, 2020 г. Менск, Беларусь. Фота: Ірына Арахоўская / Vot-tak.tv / Belsat.eu

Малы і сярэдні горад – як прадпрыемства. Паглядзіце Запіс сустрэчы дырэктара «Беларускалія» з працоўнымі яго аб’яднання. Паглядзіце запіс сустрэчы мэра Жодзіна з гараджанамі. А цяпер уявіце сабе, што такую вось разнарадку атрымае не ўся агульнанацыянальная структура «Белай Русі» ці БРСМ, а іх гаркамы. Ці змогуць яны сабраць мітынг хоць бы ў пяцьсот чалавек? Думаю, не. Потым жа трэба будзе вочы хаваць і нешта тлумачыць.

А што патлумачыш? Што свабода табе не патрэбна?

Выдатна, сябры мае. Дарога ў турму адкрыта. Ідзіце і сядзьце туды замест тых хлопцаў, каго да гэтага часу не выпусцілі. У тыя ж умовы, з тым жа абслуговым персаналам. І потым, сутак праз дзесяць пасля таго, як ваша пажаданне будзе выканана, паўторна выйдзіце на плошчу і яшчэ раз падтрымайце свайго правадыра.

Думаю, рашучае непрыманне свабоды мае шанец злёгку зменшыцца.

Аляксандр Лукашэнка belsat.eu

Меркаванне аўтараў можа не супадаць з пазіцыяй рэдакцыі.

Больш матэрыялаў