«Адбілі Пушкінскую, адаб’ем і Серабранку». Акцыя салідарнасці аўтамабілістаў у Менску. Фота
Фатографка Святлана Фар праехалася ў аўторак, 11 жніўня, ад універсаму «Рыга» да Серабранкі і сфатаграфавала акцыю салідарнасці аўтамабілістаў. У гэты момант наш карэспандэнт на праспекце Ракасоўскага паведаміў, што ў мікрараёне каля тысячы маніфестантаў дзве гадзіны трымалі ў аблозе роту ўнутраных войскаў. Прыціснутыя да дзевяціпавярховіку па адрасе Ракасоўскага 25, сілавікі стаялі, аточаныя шчытамі і слухалі натацыі і праклёны людзей. Машыны заблакавалі дарогу, людзі глядзелі на іх з вокнаў, некалькі маніфестантаў забраліся нават на дах.
Дзве гадзіны аблогі скончыліся, калі натоўп разагнала група падрыхтаваных сілавікоў, а на падмогу ўнутраным войскам з боку рынку «Серабранка» прарваўся аўтобус з АМАПам. З аўтобуса на хаду па людзях навокал АМАПаўцы стралялі гумавымі кулямі. Адначасова з гэтым сілавікі зачысцілі рынак «Серабранка» на скрыжаванні Пляханава і Ракасоўскага. Бачыў там затрыманне прынамсі аднаго маладога чалавека.
Света Фар / Belsat.eu
