Запраўка аўта, ілюстрацыйны здымак
Уведзеная пяць гадоў таму пастанова Саўміну «Аб некаторых пытаннях рэгулявання вывазу аўтамабільнага паліва з тэрыторыі Рэспублікі Беларусь» адмененая. Ці рынуцца ў Польшчу «саляравозы»?
З 1 верасня на машыне ездзіць за мяжу можна будзе хоць некалькі разоў на дзень.
Пастанову N 753, згодна з якой з запраўленым бакам без выплаты мыты за межы Мытнага саюзу можна было ездзіць не часцей, чым адзін раз у 8 дзён, Савет Міністраў выдаў 10 чэрвеня 2011 года. Калі едзеш часцей – толькі праз чырвоны канал з выплатай мыты. Так беларускія ўлады спрабавалі змагацца з вывазам паліва за мяжу. Бо яно ў Беларусі танней, чым, напрыклад, у Польшчы (на сёння ў нас $ 0,63, у палякаў – $ 1,08 за літр бензіну АІ-95).
Напачатку беларускія памежнікі забяспечвалі выкананне пастановы наступным чынам: адзін чалавек, які кіруе аўтам і не хоча плаціць дадаткова, мог выехаць за мяжу адзін раз у восем дзён. Беларусы хутка зарыентаваліся і працягнулі рэгулярна вывозіць паліва за межы Мытнага саюзу: за стырно аўта садзіліся розныя кіроўцы.
І тады на мяжы пачалі лічыць па машыне – транспартны сродак па «спрошчанай схеме» не мог пакінуць Беларусь часцей за адзін раз у восем дзён.
Беларускія мытнікі перастануць зазіраць у бак, зазірнуць польскія
Дадзеныя абмежаванні ўдарылі і па беларусах, якія не вывозілі паліва. Цяпер жа праблему зняла саўмінаўская пастанова № 526 ад 1 ліпеня 2016 года.
Але наўрад ці так званыя «саляравозы» змогуць свабодна вазіць паліва ў Еўразвяз. У прыватнасці, у Польшчы яшчэ ў 2013-м годзе ўступілі новыя правілы ўвозу паліва.
Згодна з імі, мытня пазначае колькі паліва ў баку, а аўты, якія часта перасякаюць мяжу, трапляюць у спецыяльную базу. Калі аўтамабіль з поўным бакам едзе ў Польшчу часцей чым раз на тыдзень, ад ягонага ўладальніка могуць запатрабаваць заплаціць мыту.
CA, belsat.eu, фотаздымак commons.wikimedia.org
