Ад разумнага дому да лячэбнага нейрагаджэту. 7 інавацыйных бізнес-праектаў у Беларусі
У Менску праходзіць Сусветны тыдзень прадпрымальніцтва, на адкрыцці якога прысутнічалі прэм’ер-міністр і замежныя дыпламаты. Карэспандэнт belsat.eu высвятляў, якія беларускія праекты рэпрэзентаваныя на пляцоўцы выставачнага цэнтру «Белэкспа».
Прэм’ер-міністр Сяргей Румас падчас адкрыцця Тыдня прадпрымальніцтва 12 лістапада заявіў, што ў практычным сэнсе для падтрымання бізнесу ў Беларусі дзяржаваю зроблены сур’ёзныя крокі.
«Урадам прынята новая праграма дзейнасці да 2020 года. У ёй пытанне стварэння спрыяльнага бізнес-асяроддзя замацавана ў якасці асноўнага прыярытэту эканамічнай палітыцы», – адзначыў ён.
Паводле Румаса, стварэнне прадказальнага і празрыстага заканадаўства стане для бізнесу «гарантам стабільнасці працы на нашым рынку».
На адкрыцці мерапрыемства таксама прысутнічалі павераная ў справах ЗША ў Беларусі Джэніфер Мур, кіраўніца прадстаўніцтва ЕЗ у Беларусі Андрэа Віктарын ды амбасадар Вялікай Брытаніі Фіёна Гібб.
Belsat.eu выбраў 7 найбольш цікавых і характэрных, на наш погляд, праектаў, што былі прадстаўлены ў выставачным цэнтры «Белэкспа». Сярод іх ёсць як стартапы, што толькі шукаюць фінансаванне, гэтак і праекты, якія ўжо працуюць.
Нейрагаджэт для медычных мэтаў. PigPug
PigPug займаецца распрацоўкай нейрагаджэтаў і мабільных гульняў, якія будуць счытваць мазгавыя сігналы і дапамагаць дзецям з сіндромам дэфіцыту ўвагі і гіперактыўнасці (СДУГ) вучыцца канцэнтравацца і расслабляцца.
«У мяне самога СДУГ ёсць з дзяцінства. Я даведаўся пра гэта толькі 2 гады таму, раней думаў што гэта проста асаблівасці маіх паводзінаў і гэта нармальна. Цяпер такіх дзяцей шмат. І вось мне прыйшла ідэя дапамагаць дзецям з выкарыстаннем біялагічнай зваротнай сувязі», – Віталь Карпейчык.
Карпейчык прызнаецца, што рэалізацыя гэтага стартапу ў Беларусі звязанае з вялікімі цяжкасцямі: аналагічных распрацовак у краіне няма, таму трэба атрымаць ліцэнзію і на методыку, і на выпуск самога прыставання, прычым у розных ведамствах. «А гэта вельмі складаная бюракратычная працэдура», – дадае ён.
Софт з тэхналогіяй штучнага інтэлекту. True Machina
Праект True Machina вядомага бізнесоўца і адмыслоўца ў галіне штучнага інтэлекту Валера Цурыкава прадугледжвае, што кампʼютар не будзе чакаць, калі чалавек паставіць задачу той ці іншай распрацоўкі, а сам будзе распрацоўваць новыя ідэі і тэхналогіі. Маючы вычарпальную базу дадзеных і самыя новыя веды ў патрэбнай галіне True Machina будзе генерыраваць новыя вынаходства. У True Machina ужо зацікаўленыя топавыя сусветныя кампаніі – ад Samsung да Boeing.
Платформа для наўпроставых разлікаў. Кэш’ю
Кэш’ю – гэта платформа, якая злучае прадаўцоў, банкі і пакупнікоў. «То бок вы прыходзіце, берэце тавар, заходзіце ў свой інтэрнэт-банкінг і робіце плацеж без выкарыстання банкаўскіх картак. То бок выключаюцца плацежныя сістэмы як пасярэднікі, дзякуючы чаму для прадаўца аперацыя становіцца танней», – кажа адзін з стваральнікаў стартапу Віктар Суздальцаў.
Рэалізацыя стартапу – з улікам поўнай інтэграцыі з банкамі – складзе некалькі сотняў тысяч долараў, кажа Суздальцаў.
Інавацыйныя інтэрнэт-пляцоўкі. RocketDAO і Profitrenta.com
RocketDAO – краўдфандынгавая платформа, якая працуе на прынцыпах дэцэнтралізацыі. Яна аб’яднае ў сябе стартапы, інвестараў і экспертаў.
«Фішка нашага праекту ў тым, што стартапы ніяк не ацэньваюцца. А мы хочам, каб наша экспертная супольнасць ацэньвала стартапы, якія зацікавілі інвестараў. Стартапы запаўняюць вялікую колькасць інфармацыі пра сябе і па кожнаму з 10 параметраў прызначаецца эксперт, які правярае заяўленую інфармацыю і выстаўляе ацэнку па адмыслова распрацаванай метадалогіі. Усе стасункі будуюцца на падставе смарт-кантрактаў – то бок мы проста прадстаўляем месца, дзе людзі могуць працаваць хутка і эфектыўна», – тлумачыць прадстаўніца праекту Караліна Рынкевіч.
Profitrenta.com – інтэрнэт-пляцоўка, дзе бізнес арэндадальнікі і арэндавальнікі будаўнічай тэхнікі знаходзяць адзін аднаго. Аплата адбываецца наўпрост праз сайт. Рэсурс дзейнічае з лютага 2018 года і на мае каля 500 пастаянных карыстальнікаў. Праект ужо выйшаў на расейскі рынак і плануе асвойваць краіны Балтыі.
Дырэктар праекту Вольга Мяшчаракова адзначае, што каля 70% кліенцкай базы пляцоўкі – гэта дзяржструктуры. Для дзяржаўных прадпрыемстваў адмыслова была створана сістэма тэндараў.
Разумны дом новага пакалення. Стартап QOLOS
Як тлумачаць стваральнікі праекту, на сённяшні дзень сістэма хатняй аўтаматызацыі разумны дом працуе па зададзенаму сцэнару і людзі мусяць марнаваць час на перапраграмаванне. QOLOS – запамінае вашыя паводзіны і пачынае падстройвацца пад іх, каб забяспечыць максімальны камфорт і бяспеку. Праграма сама наладжвае неабходную тэмпературу і асвятленне ў кватэры, здольная распазнаваць людзей па сістэме «свой-чужы» і анамаліі ў паводзінах – напрыклад, калі чалавек раптам лёг на падлогу не паднімаецца. У сярэднім забеспячэнне такой сістэмай двухпакаёвай кватэры абыдзецца ў $ 500, кажуць прадстаўнікі праекту.
Стваральнік стартапу – Аляксей Бабушкін. Раней ён ужо распрацоўваў розныя праекты па хатняй аўтаматызацыі.
Робаты для вытворчасці. Rozum Robotics
Робаты Rozum Robotics прызначаная для аўтаматызацыі прамысловых працэсаў на прадпрыемствах (складаванне, упакаванне, сартыраванне, раздача і г.д.). Гэта адзіная падобная распрацоўка на тэрыторыі СНД і яна ўжо выкарыстоўваецца на некаторых беларускіх прадпрыемствах у харчовай прамысловасці. Rozum Robotics з’яўляецца сябрам Парку высокіх тэхналогіяў. Нядаўна кампанія пачала экспартаваць сваю прадукцыю на замежныя рынкі – у РФ, Вялікую Брытанію, Нямеччыну.
Фэшн-сервіс для пакупак у інтэрнэце OYPER
Сістэма OYPER распрацаваная для інтэрнэт-крамаў адзення. Праграма аналізуе гісторыю запытаў карыстальніка і пакупак, і будзе прапаноўваць чалавеку адзенне з улікам ягонага густу. Такая сістэма, сцвярджаюць стваральнікі, карысная як прадаўцу (бо павялічвае колькасць пакупак у інтэрнэт-краме), гэтак і пакупнікі (бо эканоміць ягоны час падчас пошуку адзення).
«Мы ўжо цяпер працуем з амерыканскімі інтэрнэт-кампаніямі і некалькі тыдняў таму распачалі працу з расейскімі партнёрамі. Я ведаю, што ў тым ліку ў Amazon ёсць візуальныя функцыі на сайце, але менавіта рэкамендацыйная праграма, якая прапаноўвае прадукт з улікам вашага густу – яна ўнікальная», – распавядае аўтар стартапу Улад Кулецкі.
ІІ, belsat.eu
