28 лістапада ў эфір НТВ выйшла палітычнае шоу «Место встречи», у якой вядоўцы Вольга Бялова і Андрэй Норкін у абразлівай форме крытыкавалі беларускія ўлады за іх імкненне наладжваць стасункі з Еўразвязам. Газета адміністрацыі прэзідэнта «СБ-Беларусь сегодня» адрэагавала на гэту праграму невялічкай заметкай, дзе параўнала расейскае тэлебачанне з псіхлячэбніцай.
У тэксце вядоўцаў шоу называюць шаўкамі, а саму праграму «аніякай». Заказчыкаў і выканаўцаў шоу аўтар заметкі параўнаў з пацыентамі псіхіятрычнай лячэбніцы, «у якую не завезлі медыкаментаў». «Беларусь нікому не жонка, вам тым больш», – адзначае аўтар.
«Ніякае НТВ не можа нас зняважыць», – падкрэслівае ён.
Нагадаем, вядоўца падчас шоу некалькі разоў паўтарыла, што Лукашэнка вядзе сябе як «гуляшчая жонка», а пазней дадала: гэта нават не жонка, а «найстаражытнейшая» (відаць, гаворка пра прафесію – прастытуцыю – заўвага belsat.eu).
Заметка «СБ-Беларусь сегодня» была праілюстраваная карыкатурай на расейскае тэлебачанне.
ІІ, belsat.eu