Сёння стаў вядомы поўны пералік намінантаў на Прэмію імя Міхала Анемпадыстава, якая будзе прысуджана за найлепшае афармленне кніжнай вокладкі. Да ўдзелу прымаліся вокладкі беларускіх папяровых кніг, якія выйшлі ў 2018 годзе. У спіс увайшлі 62 выданні.
Сярод сябраў журы прэміі – пісьменнік, мастак Адам Глобус, літаратарка Вольга Бабкова, дызайнер Уладзімір Цэслер, пісьменнік, мастак Артур Клінаў, мастачка Антаніна Слабодчыкава, дызайнерка Алена Дашкевіч, дызайнер Юрый Тарэеў, мастачка і паэтка Васіліса Паляніна.
Шорт-ліст з 10 адзначаных журы кніг будзе абвешчаны 16 сакавіка – у дзень народзінаў Анемпадыстава. Пераможцу назавуць 7 красавіка ў менскім хабе «Ок16» падчас фестывалю інтэлектуальнай кнігі «Прадмова». Пакуль што поўны спіс можна паглядзець тут.
«Белсат» – генеральны партнёр прэміі, якая ладзіцца ў межах нашай грамадскай кампаніі «Беларускамоўныя».
Прэмія была заснаваная сёлета з ініцыятывы Беларускага ПЭН-цэнтру сумесна з Беларускім саюзам дызайнераў і «Лятучым універсітэтам», а таксама польскім партнёрам «H&L» і фондам «Адкрытая культура» ў памяць пра выбітнага дзеяча беларускай культуры, мастака, паэта, фатографа, дызайнера, публіцыста, культуролага Міхала Анемпадыстава.
Міхал Анемпадыстаў пайшоў з жыцця ў мінулым годзе.
КА, belsat.eu