Адзін чалавек загінуў, і прынамсі дзесяць асобаў – у шпіталі.
У вёсцы Дружба ў Алтайскім краі Расеі зафіксавалі ўспышку сібірскай язвы. У вёсцы з насельніцтвам 740 чалавек абвесцілі каранцін.
Дарожная паліцыя кантралюе, каб ніводзін аўтамабіль не пакінуў сяло, а ўлады забаранілі прымаць з вёскі мяса, малако ды іншыя сельскагаспадарчыя прадукты.
Цяпер адбываецца дэзынфекцыя плошчаў выпасу буйной рагатай жывёлы. Адзенне пастухоў і ветэрынараў знішчаецца.
Ад сібірскай язвы некалькі дзён таму памёр 38-гадовы мясцовы бізнесовец пасля раздзелу тушы забітай каровы. {movie}Успышка сібірскай язвы ў Расеі|right|6045{/movie}
«Ён разбіраў карову, а на руках былі нязначныя парэзы, але хто б мог падумаць адразу пра хваробу? Мы рэжам гавяду рэгулярна, і ў тым не было ніякай небяспекі. Але праз тры дні ў яго з’явілася ліхаманка, і ягоная жонка сказала, што ён не можа больш заставацца дома і павінен ехаць у шпіталь», – расказаў адзін з жыхароў вёскі.
На мінулым тыдні ў Дружбе памерла каля 10 кароў. Трупы спалілі пасля выяўлення сібірскай язвы.
Ветэрынары падазраюць, што сібірская язва распаўсюдзілася ў вёсцы з адкрытых пахаванняў кароў, якія месцяцца непадалёк месца выпасу жывёлы.
Рэгіянальныя ўлады заявілі, што ўзялі сітуацыю пад кантроль. Ветэрынары працягваюць вакцынацыю буйной рагатай жывёлы. Плануецца вакцынацыя жыхароў.
belsat.eu