92-і дзень пратэстаў: больш за 1000 затрыманых і новы ўсплёск салідарнасці ў раёнах
Чарговы нядзельны марш 8 лістапада стаў самым масавым паводле колькасці затрыманых са жніўня.
У Менску сілавікі на гэты раз не далі пратэстоўцам сабрацца ў адно вялікае шэсце – «Марш народаўладдзя», рассякаючы і абкружаючы іх у розных месцах. Тым не менш, шматтысячныя групы нязгодных здолелі сабрацца каля стэлы і на вуліцы Багдановіча.
Затрыманні адбываліся на вуліцы Леніна, на праспектах Пераможцаў і Машэрава, у дварах і ў парку каля опернага тэатру.
Зоркі за кратамі
Агулам затрымана па выніках дня, паводле падлікаў валанцёраў, больш як 1000 чалавек. Сярод іх шмат знакамітасцяў:
- Міс Беларусь-2008 і былая прэс-сакратарка «Дынама Берасце» Вольга Хіжынкова,
- вядоўца «Калыханкі» Аляксандр Ждановіч, больш вядомы як Маляваныч,
- зорка лёгкай атлетыкі, срэбны прызёр Алімпіяды Андрэй Краўчанка,
- пераможца Кубка свету па кікбоксінгу, сярэбраны прызёр чэмпіянату свету па кікбоксінгу Іван Ганін,
- былы артыст Cirque du Soleil Сямён Букін,
- сябра Каардынацыйнай рады Андрэй Ягораў.
Таксама было затрымана шмат журналістаў (Ян Аўсяюшкін, Алена Шабуня, Арцём Лява, Яўген Шапчыц, Святаслаў Зоркі і Віктар Талочка), валанцёры Чырвонага крыжа.
Новая салідарнасць
Пры затрыманнях сілавікі паводзілі сябе вельмі жорстка, у РАУСах затрыманыя па шмат гадзін стаялі на вуліцы, а некаторых з іх забіралі хуткія.
У адказ на гвалт быў абвешчаны паўторны марш. У цэнтр зноў скіравалася спецтэхніка, а на раёнах з новай сілай пачаліся ланцугі салідарнасці і шэсці. У тым ліку, акцыі праходзілі ў мікрараёнах Каменная Горка, Лошыца, Сухарава, Міхалова, Курасоўшчына, Новая Баравая, у Бараўлянах і Лебядзіным ды іншых месцах.
Апроч Менску, акцыі рознага памеру праходзілі ў іншых мясцовасцях Беларусі. Сярод іх Гомель, Баранавічы, Ляхавічы, Полацк, Ракаў, Клічаў, Прылукі, Чэрвень, Лагойск, Дзяржынск, Ваўкавыск, Нягневічы ды іншыя.
Затрыманні і акцыі ў сталіцы працягваюцца і дагэтуль.
9 лістапада спаўняецца тры месяцы з моманту пачатку паслявыбарных пратэстаў. За гэты час у Беларусі, паводле падлікаў, затрымалі ўжо больш за 18 тыс. чалавек.
МГ belsat.eu
