Статкевіч у штрафным ізалятары. Адміністрацыя турмы кажа, што ён «схільны да суіцыду»

Жонка палітыка Марына Адамовіч мяркуе, што Мікалаю Статкевічу могуць дадаць яшчэ год да цяперашняга турэмнага тэрміну.

Падставаю могуць зрабіцца “рэгулярныя парушэнні” турэмнай дысцыпліны, сярод якіх не пазначаныя ў спісе рэчаў насоўкі ды адсутнасць індывідуальнай таблічкі з нумарам, якую ў яго забралі самі турэмшчыкі. Спадарыня Адамовіч называе гэткія дзеянні адміністрацыі правакацыямі, у выніку якіх палітвязень раз за разам трапляе ў штрафны ізалятар.

Запасны варыянт?



Раней да Статкевіча падсялілі чалавека, які назваўся імем ягонага знаёмага і паведаміў, што быў у камеры для хворых на СНІД. Сёння адміністрацыя турмы кажа пра заўважаныя ў Мікалая Статкевіча “схільнасці да суіцыду”.

“Калі я прыехала першы раз у магілёўскую турму, мне начальнік пачаў казаць пра нейкія “суіцыдальныя схільнасці”, але тады ішлі вельмі гучныя размовы пра спробу суіцыду Аўтуховіча. Таму я вырашыла, што ён пераблытаў – сказала, што гэта дакладна не пра Міколу. Але цяпер высвятляецца, што спробы ўжыць да яго гэткую кваліфікацыю працягваюцца, і гэта мяне сапраўды напружвае. Мабыць, скарыстаўшы ўсе формы ціску на Міколу, яны пакідаюць такі запасны варыянт, – кажа спадарыня Адамовіч і дадае: – Але скажу ім: не дачакаецеся”.

belsat.eu