Менская пракуратура вынесла папярэджанне праваабаронцу Андрэю Бандарэнку за «дыскрэдытацыю Рэспублікі Беларусь». Сам праваабаронца звязвае гэты ціск са сваёй грамадскаю дзейнасцю.
Афіцыйнаю падставаю для папярэджання паслужыў зварот інфармацыйна-асветніцкай установы «Платформа», якую ўзначальвае Андрэй Бандарэнка, у Міжнародную федэрацыю хакею з заклікам не праводзіць у Беларусі чэмпіянату свету па хакеі 2014 г., пакуль не будуць вызваленыя ўсе палітвязні, а таксама не спыняцца рэпрэсіі ў дачыненні праваабаронцаў, журналістаў і актывістаў грамадзянскай супольнасці.
Пракуратура пабачыла ў гэтым звароце «заведама ілжывыя звесткі аб палітычным і сацыяльным становішчы Рэспублікі Беларусь, прававым становішчы грамадзянаў у Рэспубліцы Беларусь, якія дыскрэдытуюць Рэспубліку Беларусь або яе органы».
Хто насамрэч дыскрэдытуе Беларусь?
«Абсурднасць сітуацыі ў тым, што ўлады краіны самі дыскрэдытуюць Рэспубліку Беларусь, груба парушаюць правы грамадзянаў, ігнаруюць Канстытуцыю, а папярэджання выносяцца тым, хто адважыўся пра гэта сказаць, – цытуе Бандарэнку сайт «Платформы». – У краіне людзей затрымліваюць за іхныя погляды, адвакатаў пазбаўляюць ліцэнзіяў, фармуюць спісы невыязных, міліцыя жорстка збівае грамадзянаў сваёй краіны, судовая сістэма цалкам падкантрольная ўладам і пазбаўленая незалежнасці, а нам кажуць, што ў краіне ўсё ў поўным парадку і мы наперадзе планеты ўсёй».
Бандарэнка перакананы ў тым, што зварот у Міжнародную федэрацыю хакею быў толькі нагодаю для папярэджання. «Сапраўдная прычына крыецца ў маіх міжнародных кантактах, дзе я адкрыта распавядаю пра тое, што адбываецца ў краіне», – заявіў праваабаронца.
Дзіўныя самагубствы ў турмах
Сёлета ў лютым «Платформа» абвесціла пра пачатак рэалізацыі новага праекту – «Маніторынг правоў чалавека ў месцах пазбаўлення волі». Мэта маніторынгу –«атрыманне дакладнай інфармацыі пра стан справаў з правамі зняволеных у следчых ізалятарах і папраўчых калоніях Рэспублікі Беларусь, інфармаванне адпаведных органаў і міжнародных структураў».
18 чэрвеня на прэс-канферэнцыі ў Менску Андрэй Бандарэнка паведаміў, што «Платформа» мае намер правесці расследаванне фактаў гібелі вязняў у беларускіх калоніях. Паводле яго, выпадкі гібелі зняволеных апошнім часам «пачасціліся». «Толькі за чатыры месяцы да нас паступілі чатыры заявы аб гібелі людзей у штрафных ізалятарах. Ува ўсіх выпадках гаворыцца пра тое, што людзі ў СІЗА скончылі жыццё самагубствам пры цалкам нявызначаных і незразумелых абставінах», – распавёў Бандарэнка.
Ён падкрэсліў, што пракуратура на гэтыя заявы ніяк не рэагуе. «Таму мы проста вымушаныя пачаць уласныя расследаванні і дамагацца таго, каб даведацца праўду пра гэтыя смерці», – заявіў праваабаронца.
belsat.eu
