Анатолю Куляшову не хапіла двух тыдняў, каб адзначыць угодкі на міністэрскай пасадзе. Сёння, 11 траўня, Аляксандр Лукашэнка вызваліў яго ад абавязкаў кіраўніка Міністэрства ўнутраных справаў. На ягонае месца прызначаны 45-гадовы следчы Ігар Шуневіч.
Указ пра змену міністра Аляксандр Лукашэнка падпісаў праз тры дні пасля паслання да парламенту і народу. У ім прэзідэнт абяцаў глыбока рэфармаваць Міністэрства ўнутраных справаў такім чынам, каб “нікога не пакрыўдзіць”. Сёння Аляксандр Лукашэнка публічна прэзентаваў пераемніка Куляшова.
Паводле праваабаронцы і былога следчага, адстаўка Куляшова планавалася яшчэ паўгода таму.
“Апошнім часам міністр даволі часта быў на бальнічным, а гэта ж даволі сур’ёзная пасада, дзе міністр мусіць увесь час прысутнічаць. Фактычна гэта апошні чалавек Навумава з найвышэйшых эшалонаў улады. Каманда Куляшова проста выканала сваю задачу ў снежні 2010 г., і цяпер яны пакрыху вызваляюць свае месцы”, – кажа Алег Волчак.
Якою будзе міліцыя з новым міністрам? Магчыма, дзякуючы ўплыву КДБ праваахоўнікі ўзмоцняць свае пазіцыі, а можа, спецслужбы пачнуць адыгрываць яшчэ больш важную ролю.
Новы міністр МУС Ігар Шуневіч нарадзіўся ва Украіне, аднак юрыдычную адукацыю атрымаў у нашай краіне. Кар’еру распачаў у міліцыі, аднак сапраўднага поспеху дабіўся ў КДБ, дзе даслужыўся да кіраўніка следчага аддзелу. Менавіта ён разглядаў справу паслявыбарчых пратэстаў 2010 г., пасля чаго атрымаў пасаду намесніка міністра ўнутраных справаў.
“На сёння выглядае, што пазіцыі МУС будуць аслабленыя, і адзінаю моцнаю сілавою структураю застанецца КДБ. Вядома, на такую пасаду ставяць адданых людзей, сваю адданасць ён даказаў падчас разгляду паслявыбарчых справаў. Я думаю, што гэты чалавек будзе да канца адданы сістэме, бо ён шмат ведае і будзе яшчэ доўга патрэбны на гэтай пасадзе”, – мяркуе праваабаронца.
Кожны аўтарытарны рэжым баіцца наменклатурнага перавароту. Куляшоў, які прайшоў шлях ад міліцыянта да міністра, мог быць небяспечным. Як мяркуе Волчак, гэта стала адною з галоўных прычынаў страты пасады.
belsat.eu