У Беларусі, якая наймацней пацярпела ў выніку чарнобыльскай аварыі, рыхтуецца пляцоўка для новай АЭС, а кіраўнік краіны ўжо хоча будаваць і другую. У забруджаныя зоны размяркоўваюць маладых адмыслоўцаў, а акцыі дэмакратычных сілаў на ўгодкі трагедыі збіраюць усё менш удзельнікаў.
“Белсат” запытаўся ў менчукоў: ці дагэтуль актуальная праблема чарнобыльскай катастрофы? Чаму “Чарнобыльскі шлях” збірае не так шмат людзей, як у 1990-я?
“Яна назаўсёды застанецца актуальная для Беларусі, бо тыя землі, што забруджаныя радыенуклідамі, яшчэ не хутка ачысцяцца. Я супраць таго, што там засяляюць тэрыторыі ды аруць палі. Зямлі ў Беларусі хапае. Не разумею гэтага. Не выходзяць, бо баяцца. Кожны сядзіць у сваёй шкарлупіне – аб’яднацца, напэўна, вельмі цяжка, нават з нагоды агульнай бяды. Кожны сам за сябе, як у джунглях”, – кажа мужчына.
“Я не думаю, што гэта актуальнае пытанне. Мы ўжо змірыліся – шмат часу мінула, забыліся ўжо ўсе на гэта”, – адказвае студэнтка.
“Канечне, актуальная – і да нас даходзіць нейкае водгулле трагедыі. Хіба самасвядомасць людзей не настолькі высокая, каб падтрымліваць падобныя акцыі”, – мяркуе дзяўчына.
“Яна будзе актуальная яшчэ шмат пакаленняў. Але ў людзей ужо ў галовах іншыя думкі, яны не думаюць пра тое, што было калісьці. Людзі працуюць, думаюць пра сённяшні дзень – усё роўна прыйдзецца жыць так, як ёсць”, – дзеліцца чарговая рэспандэнтка.
“Мне падаецца, што праблема застаецца і датычыць хіба кожнага. На гэтыя акцыі трэба хадзіць, каб памятаць аб праблеме”, – упэўненая студэнтка.
belsat.eu