Акцыя пратэсту пачалася 14 траўня ў звязку з пераносам амерыканскай амбасады з Тэль-Авіва ў Іерусалім.
Паводле ізраільскіх вайскоўцаў, у пратэстах бралі ўдзел каля 35 000 чалавек. Ізраільскія жаўнеры стралялі ў палестынцаў, якія спрабавалі парушыць дзяржаўную мяжу.
«Кожная дзяржава павінна абараняць свае межы. ХАМАС дэкларуе намер знішчыць Ізраіль і пасылае тысячы людзей, якія павінны прарваць мяжу, каб дасягнуць мэтаў, пастаўленых ХАМАСам. Мы працягнем цвёрда дзейнічаць, абараняючы свой суверэнітэт і сваіх грамадзянаў», – заявіў днём раней прэм’ер-міністр Ізраілю Бэньямін Нэтаньягу.
Па стане на раніцу 15 траўня вядома пра 59 забітых. Паведамляецца, што сярод іх 7 няпоўнагадовых у тым ліку 8-месячнае немаўля (памерла ад слезацечнага газу, які ўжываўся для разгону пратэстоўцаў). Не менш за 2700 асобаў атрымалі раненні (1370 чалавек атрымалі агнястрэльныя раненні), піша dw.com.
Перанос амбасады ЗША ў Іерусалім адбыўся ў дзень 70-й гадавіны стварэння дзяржавы Ізраіль (14 траўня 1948 года). Такім чынам Злучаныя Штаты прызналі Іерусалім сталіцай Ізраіля. Рашэнне аб пераносе амбасады ў Іерусалім было прынятае ў 2017 годзе.
Прызнаць Іерусалім сталіцай Ізраілю было адным з абяцанняў Трампа падчас ягонай прэзідэнцкай кампаніі ў 2016 годзе.
15 траўня палестынцы адзначаюць дзень «Накба», узгадваючы выгнанне арабаў (каля 725 000 чалавек) с месцаў іхнага пражывання падчас Араба-ізраільскай і Шасцідзённай вайны.
Ізраіль абвясціў Іерусалім сваёй сталіцай у 1950 годзе. Палестына таксама лічыць Іерусалім сваёй сталіцай.
ЮВ, belsat.eu