Сотні прыхільнікаў прэзідэнта Сірыі Башара аль-Асада паўсталі ўздоўж вуліцаў Дамаску, каб вітаць міністра замежных справаў Расеі Сяргея Лаўрова. Дыпламат прыехаў у Сірыю разам з дырэктарам Службы вонкавай выведкі Расеі Міхаілам Фрадковым.
З пятнаццаці краінаў-чальцоў Рады Бяспекі ААН толькі Расея і Кітай галасавалі супраць рэзалюцыі, якая заклікае дзейнага кіраўніка Сірыі пакінуць пасаду. Паводле некаторых аналітыкаў, толькі дзякуючы гэтаму Башару аль-Асаду ўдаецца заставацца пры ўладзе.
Тым часам апазіцыя паведамляе, што адно ў панядзелак сілы бяспекі ды войска забілі 95 чалавек у Гомсе – горадзе, які стаўся цэнтрам супраціву сірыйскаму дыктатару. Паведамляецца, што пры гэтым войскі Асада выкарысталі авіяцыю.
Афіцыйны Дамаск заяўляе, што змагаецца з бандамі крымінальнікаў, а не апазіцыяй. Ад пачатку пратэстаў у Сірыі, паводле звестак ААН, загінулі больш за 5000 чалавек.
belsat.eu