Чым сёння жыла Беларусь – Belsat.eu падводзіць вынікі чарговага дня супрацьстаяння беларускага народу і ўладаў.
Пратэсты
Жанчыны ў Дзень маці прайшліся вуліцамі беларускай сталіцы. Пра затрыманні невядома, надвор’е было кепскае, але нягледзячы на гэта, у цэнтр Менску выйшлі сотні жанчын.
Гвалт і салідарнасць
Менскі бізнесоўца Максім Харошын, якога моцна збілі сілавікі 13 кастрычніка, не пазнаў жонку. Ягоны стан здароўя моцна пагоршыўся.
Жонка Максіма. Кацярына Харошына таксама распавяла «Белсату» пра свой цяперашні стан:
«Мы трымаемся, спадзяемся на лепшае, але дактары сцвярджаюць, што стан Максіма – гэта наступствы чэрапна-мазгавой траўмы».
Перад кветкавай крамай пары сёння стаяла доўгая чарга.
Лукашэнка папрасіў вызваленага палітвязня падрыхтаваць спіс асобаў, якіх таксама можна выпусціць
Сёння выйшла праграма «ОбъективНо» на тэлеканале АНТ, у якой палітвязень Юры Васкрасенскі кажа, што Лукашэнка прасіў яго скласці спіс асбоаў, якія «не так небяспечны для грамадства».
Адметна, што Юры Васкрасенскі ўтрымліваецца пад хатнім арыштам і даваць каментары незалежным медыям яму забаронена. Затое браць удзел у перадачах дзяржаўнай тэлевізіі, відавочна, беларускія праваахоўныя органы дазваляюць.
Беларусы з гуманітарнай візай змогуць працаваць у Польшчы
Беларусы, якія праз рэпрэсіі былі вымушаныя выехаць у Польшчу і атрымалі гуманітарную візу, змогуць працаваць ужо з сярэдзіны лістапада. Пра гэта абвесціў дэпутат польскага Сейму Міхал Шчэрба на прэсавай канферэнцыі Цэнтру Беларускай Салідарнасці. Раней такой магчымасці не было.
Содні
Журналісту «Белсату» Змітру Казакевічу сёння прысудзілі 3 дні арышту за нібыта ўдзел у несанкцыянаванай акцыі пратэсту 6 верасня. Пасля суду міліцыянты з крымінальнага вышуку павезлі Змітра дадому, каб правесці ператрус.
У Віцебску 14 кастрычніка затрымалі Таццяну Севярынец і не выпусцілі праз тры гадзіны з Першамайскага РУУСа ў Віцебску. Пратрымаўшы некалькі гадзін у Першамайскім РУУС у Віцебску, Таццяну Севярынец, маці трох дзяцей і бабулю сямі ўнукаў, адвезлі да суду ў СІЗА, бо паводле мужа Таццяны Кастуся Севярынца, ІЧУ ў Віцебску часова не працуе). Што ёй прад’яўляюць – не паведамілі.
Таццяна – вядомая грамадская актывістка, маці апазіцыйнага палітыка Паўла Севярынца, які ўжо чатыры месяцы знаходзіцца ў зняволенні і прызнаны вязнем сумлення.
Святлана Ціханоўская звярнулася да працаўнікоў беларускіх заводаў і прадпрыемстваў
Яна заклікала да аб’яднання:
«Уся ваша барацьба патрабуе велізарнай мужнасці. І я ведаю, што вам нялёгка. Але тое, што вы робіце, з кожным днём набліжае нас да перамогі. Аб’ядноўвайцеся. Дзейнічайце. Выходзіце з праўладных прафсаюзаў і стварайце свае, незалежныя. Калі вас будуць пазбаўляць прэміяў або звальняць – звярніцеся ў фонды».
Швейцарыя ўвяла санкцыі ў дачыненні да 40 беларускіх чыноўнікаў
Санкцыі Швейцарыі прадугледжваюць блакаванне рахункаў і забарону на ўезд у краіну. У чорны спіс увайшлі кіраўнік МУС Юрый Караеў, ягоныя намеснікі і іншыя сілавікі, былы кіраўнік КДБ Валерый Вакульчык і ягоныя намеснікі, былы генпракурор Аляксандр Канюк, кіраўніца ЦВК Лідзія Ярмошына ды іншыя прадстаўнікі ЦВК.
Санкцыі пачалі дзейнічаць з 13 кастрычніка.
