56-ты дзень пратэстаў. Затрыманні ў Салігорску, новы фармат жаночага маршу

Субота 3 кастрычніка стала 56-м днём пратэстаў. Belsat.eu падводзіць вынікі чарговага дня супрацьстаяння беларускага народу і ўладаў.

Затрыманні і пераслед

Журналістаў «Белсату» Алеся Любянчука і Дзяніса Ганчарэнку перавезлі з Акрэсціна ў ізалятар у Баранавічах. Раней туды ж перавезлі журналістку Алену Доўнар.

Алеся Любянчука і Дзяніса Ганчарэнку затрымалі ў Менску 24 верасня. На іх склалі пратаколы за «непадпарадкаванне міліцыі» і «парушэнне закону аб СМІ». Суд пакараў абодвух журналістаў адміністратыўным арыштам на 12 содняў. Таксама Любянчука і Ганчарэнку аштрафавалі на 30 базавых велічыняў кожнага.

Да гэтага часу за кратамі застаюцца 5 журналістаў «Белсату».

Сёння ж у Салігорску міліцыянты затрымалі фотакарэспандэнтку Ірыну Арахоўскую. Сілавікі выдалілі ўсе яе фотаздымкі і запатрабавалі напісаць «тлумачальную». Тэхніку не забіралі, пратакол не складалі.

У Салігорску сёння была сустрэча страйкоўцаў з Юрыем Корзунам. Ён сказаў, што міліцыя дазволіла правесці экскурсію і нікога затрымліваць не будуць. Але літаральна праз тры хвіліны прыехаў АМАП і пачаліся затрыманні, затрымалі і Юрыя Корзуна. Агулам на акцыі ў Салігорску затрымалі каля 20 чалавек. Большасць затрыманых – сябры стачкаму «Беларуськалію».

У Гомлі ў доме галоўнай рэдактаркі выдання «Сильные новости» Ганны Якштас і яе мужа Дзяніса адбыўся ператрус. Сілавікі забралі ўсю тэхніку, Ганну і Дзяніса павезлі ў РАУС. Пазней міліцыянты патлумачылі, што журналістаў затрымалі ў межах адміністрацыйнага працэсу. Ганну Якштас і карэспандэнта выдання Дзяніса Якштаса, затрыманых сёння, пакінулі пад вартай да суду.

Праваабарончы цэнтр «Вясна» паведамляе, што ліставанне Марыі Рабковай нават з роднымі цалкам спынена і штучна блакуецца. З 10 лістоў бацькам і сваякам да адрасатаў не трапіў ніводны.

Праваабаронцы заклікаюць усіх, хто будзе пісаць Марфе ў СІЗА, адпраўляць лісты ды паштоўкі «1 класам» або «заказным», каб можна было адсочваць рух карэспандэнцыі.

Міжнародная рэакцыя на гвалт у Беларусі

«ЗША будуць выкарыстоўваць усе магчымыя для нас інструменты, каб прыцягнуць да адказнасці тых, хто мае намер падарваць дэмакратыю», – напісаў дзяржаўны сакратар ЗША Пампэа ў сваім Twitter.

Пампэа падкрэсліў, што Дзярждэпартамент вітае рашэнне Мінфіна ЗША ўвесці санкцыі супраць шэрагу беларускіх афіцыйных асобаў, адказных за рэпрэсіі і фальсіфікацыю выбараў. Нагадаем, у санкцыйны спіс ЗША ўвайшлі 8 чалавек.

Прэс-сакратар МЗС Беларусі Анатоль Глаз заявіў БелТА, што агучаныя напярэдадні прапановы па скарачэнні дыпперсаналу ў амбасадах Літвы і Польшчы абавязковыя да выканання.

Нагадаем, учора ў МЗС заявілі, што амбасадарам Польшчы і Літвы «прапанавана да 9 кастрычніка 2020 гады прывесці да парытэту з беларускімі замежнымі ўстановамі ў адпаведных краінах склад сваіх дыпламатычных прадстаўніцтваў у Беларусі». Для Літвы гэта, адпаведна, з 25 да 14 дыпламатаў, а для Польшчы – з 50 да 18.

Між тым міністр замежных справаў Лінас Лінкявічус заявіў, што Літва не мае намеру адклікаць свайго амбасадара ў Беларусі для кансультацыяў або скарачаць штат амбасады.

У Менску прайшоў кветкавы марш жанчын. Сённяшняя жаночая акцыя адрозніваецца ад папярэдніх традыцыйных суботніх шэсцяў тым, што яе ўдзельніцы не ходзяць вялікай калонай, а размяркоўваюцца паміж ЦУМам і ГУМам невялікімі групамі.

Чарговая ахвяра катаванняў

Збіты на Акрэсціна Дзяніс К. сёння памёр у Больніцы хуткай медычнай дапамогі. Мужчына паступіў 29 верасня з мноствам траўмаў. Пра смерць мужчыны «Белсату» распавялі ягоныя родныя.

«Звычайна Дзяніс на некалькі дзён выязджае па працы. Мы ведалі, што яго не будзе. Але нават уявіць не маглі, што такое з ім можа быць. Нам проста патэлефанавалі з больніцы. Мы не ведаем, як і хто яго збіў. Нам у больніцы сказалі, што лекарам ён паспеў распавесці, што яго збілі міліцыянты А вось міліцыянты з сваю чаргу сказалі, што ён зваліўся з другога яруса ложка. Але канечне, з такімі траўмамі, мы разумеем, што гэта немагчыма», – кажа сваячка Дзяніса К.

На смерць мужчыны адрэагавалі ў Следчым камітэце.

«У ходзе праверкі ўстаноўлена, што мужчына быў затрыманы за адміністратыўнае правапарушэнне (дробнае хуліганства) і ўтрымліваўся ў ІЧУ ГУУС Менгарвыканкама. Таксама следствам папярэдне ўстаноўлена, што ён упаў з другога яруса ложка і такім чынам атрымаў цялесныя пашкоджанні.

Для ўстанаўлення дакладнай прычыны смерці прызначана судова-медычная экспертыза, вынятая неабходная медычная дакументацыя, апытваюцца відавочцы». Паводле СК, мужчына быў затрыманы не за ўдзел у пратэстах.

СК belsat.eu