50-ы дзень пратэстаў. Незвычайны маршрут і 100 тыс. на «Народнай інаўгурацыі» Ціханоўскай
27 верасня ў Менску і іншых гарадах Беларусі прайшоў марш пратэсту пад назваю «Народная інаўгурацыя».
«Народная інаўгурацыя» Святланы Ціханоўскай стала адказам грамадства на неансаваную інаўгурацыю Аляксандра Лукашэнкі, якая адбылася 23 верасня.
Акцыя ў Менску сабрала не менш за 100 тысяч удзельнікаў. Сабраўшыся традыцыйна каля стэлы, людзі нечакана пайшлі незвычайным маршрутам. Па праспекце Машэрава, вуліцах Багдановіча і Сурганава людзі выйшлі на праспект Незалежнасці, але далей пайшлі не ў бок цэнтру, дзе іх чакалі сілавікі, а ў бок Уручча. Акцыя скончылася каля станцыі метро «Барысаўскі тракт», але каля дамоў АМАПу на Русіянава ўдзельнікаў ужо чакалі аўтазакі.
Падчас акцыі традыцыйна блакаваўся мабільны інтэрнэт і станцыі метро там, дзе хадзілі мітынгоўцы.
Напачатку і напрыканцы «Народнай інаўгурацыі» не абышлося без затрыманняў.
Апроч Менску маршы прайшлі і ў іншых гарадах, найбуйнейшыя з іх адбыліся ў абласных цэнтрах.
Праваабаронцам «Вясны» ужо вядомыя прозвішчы больш за 260 затрыманых у Менску і рэгіёнах падчас сённяшніх акцый пратэсту. Затрыманні адбываліся, сярод іншага, у Бабруйску, Баранавічах, Беразіне, Берасці, Браславе, Віцебску, Воршы, Глыбокім, Гомлі, Горадні, Жодзіне, Лідзе, Магілёве, Маладзечне, Міханавічах, Наваполацку, Светлагорску. Спіс працягвае дапаўняцца.
Для разгону дэманстрантаў у Магілёве і Гомлі ўжываліся спецсродкі, у тым ліку слезацечны газ і светлашумавыя гранаты. МУС пацвярджае ўжыванне толькі газу.
Па сканчэнні маршу NEXTA апублікаваў спісы каля 800 працаўнікоў гомельскай міліцыі на знак пакарання за брутальны разгон гамельчукоў.
МГ belsat.eu
