48-ы дзень пратэстаў. Суды над журналістамі і адвакатам, затрыманні актывістаў

Пятніца 25 верасня стала чарговым днём паслявыбарных пратэстаў у Беларусі. belsat падводзіць вынікі дня.

Затрыманых 24 верасня ўвечары каля Акрэсціна журналістаў «Белсату» Алеся Любенчука і Дзяніса Ганчарэнку пакаралі арыштам на 12 содняў і штрафам 30 базавых велічыняў за працу без акрэдытацыі.

На цяперашні момант за кратамі застаюцца чацвёра журналістаў, якія супрацоўнічаюць з нашым тэлеканалам: Алесь Любянчук, Дзяніс Ганчарэнка, Павел Патапаў і Яўген Меркіс.

Аператара Паўла Патапава затрымалі 24 верасня, суда яшчэ не было. Яўгена Меркіса затрымалі 14 верасня і пакаралі 15 соднямі арышту нібыта за ўдзел у несанкцыянаваным мерапрыемства. Ён мусіць выйсці на волю 29 верасня.

Журналістаў «Белсату» пакаралі 12-дзённым арыштам і штрафам

У Больніцы хуткай медычнай дапамогі ў Менску памёр 36-гадовы Сяргей Радчэня – мужчына, які падпаліў сябе на ганку аддзялення міліцыі ў Смалявічах, павідаміла прэсавая служба міністэрства аховы здароўя.

Мужчына знаходзіўся ў рэанімацыі Рэспубліканскага апёкавага цэнтру Больніцы хуткай медычнай дапамогі ў Менску, ён памер уначы 25 верасня.

18 верасня ў Смалявічах перад будынкам міліцыі чалавек абліў сябе бензінам і падпаліў. Сведкі кажуць, што мужчына зрабіў гэта ў знак пратэсту супраць дзеянняў сілавікоў.

У дачыненні да галоўнага рэдактара «Наша ніва» Ягора Марціновіча міліцыянты распачалі яшчэ і адміністрацыйную справу. Адміністрацыйную справу, як мяркуе ягоная жонка Адар’я Гуштын, журналістка TUT.by, распачалі нібыта за ўдзел у несанкцыянаванай акцыі.

Цяпер Ягор Марціновіч затрыманы. Раней у яго доме зладзілі ператрус у межах крымінальнай справы за паклёп у дачыненні да намесніка міністра ўнутраных справаў Аляксандра Барсукова.

Ягора Марціновіча міліцыянты затрымалі падчас жорсткага разгону мітынгоўцаў 11 жніўня. Некалькі дзён родныя і блізкія Марціновіча не ведалі пра яго месцазнаходжанне.

Адміністрацыйную справу будуць разглядаць 28 верасня.

Журналісцкая супольнасць патрабуе вызвалення Ягора Марціновіча

8 кастрычніка ў Эканамічным судзе Менску мае адбыцца разгляд позвы Міністэрства інфармацыі аб спыненне выпуску сеткавага выдання TUT.BY.

У выпадку, калі суд стане на бок Міністэрства інфармацыі, TUT.BY можа страціць статус сродка масавай інфармацыі. Праўда, партал працягне працу ў якасці інтэрнэт-рэсурсу без статусу СМІ. Гэты статус дае магчымасць журналістам на законных падставах прысутнічаць у раёнах узброеных канфліктаў ці надзвычайных сітуацыяў, на масавых мерапрыемствах, у месцах іншых грамадскіх важных падзеяў і перадаваць адтуль інфармацыю.

Рэдакцыя парталу TUT.BY. Фота: Viktor Drachev / TASS / Forum

Міністэрства інфармацыі з жніўня бягучага году чатыры разы выносіла папярэджанне рэсурсу. Для таго, каб пазбавіць партал статуса СМІ, дастаткова трох папярэджанняў на працягу года.

Мінінфармацыі хоча пазбавіць TUT.BY статуса СМІ

Беларускія праваабаронцы лічаць, што затрыманне і завядзенне крымінальнай справы ў дачыненні да Сцяпана Латыпава мае заказны, палітычна матываваны характар.

Прадстаўнікі беларускіх праваабарончых арганізацыяў заявілі, што прызнаюць Сцяпана Латыпава палітычным зняволеным.

Правабаронцы патрабуюць неадкладна вызваліць Сцяпана Латыпава з-пад варты і спыніць ягоны крымінальны пераслед, а таксама вызваліць усіх палітычных зняволеных, спыніць гвалт і рэпрэсіі ў дачыненні да грамадзянаў краіны.

Схопленую сілавікамі абаронцу Калеснікавай асудзілі

Суддзя Кастрычніцкага суда Менску Аляксандр Рудэнка палічыў адваката Людмілу Казак вінаватай у парушэнні арт. 23.4 КаАП (Непадпарадкаванне законнаму распараджэнню ці патрабаванню службовай асобы пры выкананні ім службовых паўнамоцтваў). За гэтае парушэнне Людміле Казак суддзя прызначыў штраф у памеры 675 рублёў.

Людміла Казак перастала выходзіць на сувязь 24 верасня. Вечарам стала вядома, што яна знаходзіцца ў Цэнтральным РАУС сталіцы. На адваката склалі два пратаколы паводле арт. 23.34 КаАП (удзел у несанкцыянаваным масавым мерапрыемстве) і 23.4 КаАП (непадпарадкаванне патрабаванням працаўнікам міліцыі).

Падчас суда Людміла Казак распавяла, што яна не магла прымаць удзел у масавай акцыі 30 жніўня, паколькі ў гэты дзень разам з сваёй дачкой была ў краме. Таму ў выніку гэтае абвінавачванне знялі.

Казак звязвае сваё затрыманне з выкананнем свае прафесійных абавязкаў і абаронай Марыі Калеснікавай.

Марыя Калеснікава. Менск, Беларусь. 24 жніўня 2020 г. Фота: Света Фар / belsat.eu

Менскі гарадскі суд чарговы раз адхіліў скаргу абароны Марыі Калеснікавай на рашэнне суда Партызанскага раёну Менску аб ужыванні меры стрымання. Марыя застаецца ў ІЧУ Жодзіна.

У Менску затрымалі актывіста «Еўрапейскай Беларусі» Яўгена Афнагеля. Міліцыянты выламалі дзверы ў ягонай кватэры і звезлі мужчыну ў невядомым накірунку. Пазней яго жонцы ў СК распавялі, ён пакуль знаходзіцца ў ІЧУ на Акрэсціна і таксама абвінавачваецца ва ўдзеле ў масавых беспарадках.

У Магілёве асудзілі студэнта, які нібыта прыйшоў на мітынг з 2 нажамі, кіем і за грошы

СК belsat.eu

Hавiны