Чацвер 24 верасня стаў чарговым днём паслявыбарных пратэстаў у Беларусі. Падводзім вынікі дня.
47-ы дзень пратэстаў пачаўся з васьмібальных пробак на дарогах Менску. Падобна, што людзі перакрывалі дарогі і наўмысна стваралі заторы на знак нязгоды з палітыкай дзейных уладаў. У прыватнасці, коркі былі сёння на МКАД, ля ст.м.Пушкінская і на Усходзе.
Свае акцыі працягвалі і студэнты. На маршы і пікеты выйшлі навучэнцы БДЭУ, БДМУ і МДЛУ, а ў БДУІР студэнты пачалі сядзячую акцыю пратэсту. Таксама на пратэст выйшлі працоўныя Метрабуду. Людзі станавіліся ў ланцугі ў розных частках гораду, напрыклад на скрыжаванні Партызанскага праспекту і вуліцы Кашавога. Таксама на традыцыйныя вячэрнія акцыі выйшлі Сухарава, Каменная Горка, Курасоўшчына, Пушкінская, Серабранка, Усход, Плошча Перамен, Грушаўка, Малінаўка і іншыя. Ланцуг салідарнасці на праспекце Дзяржынскага сілавікі разагналі.
У Горадні выйшлі жыхары мікрараёну Дзевятоўка і вуліцы Паповіча.
Працягнулі свае акцыі і кібер-партызаны, якія, паводле іх словаў, узламалі сістэму разлікаў АРІП і зноў узламалі сайт Акадэміі МУС.
А ў папраўчай калоніі № 22, якую яшчэ называюць «Воўчыя норы», каля Івацэвічаў 23 верасня адбыўся моцны пажар. Паводле крыніцаў «Белсату», зняволеныя абурыліся інаўгурацыяй Лукашэнкі і падпалілі прамысловую зону.
Новыя затрыманні
На жаль, не адбылося без затрыманняў. Гэтак, паводле адміністрацыйнай справы была затрыманая адвакатка Марыі Калеснікавай Людміла Казак.
З Акрэсціна пасля 11 содняў арышту выйшлі журналісты Аляксандр Васюковіч і Уладзь Грыдзін. Але былі затрыманыя журналістаў Алесь Любянчук і Дзяніс Ганчарэнка, якія чакалі іх каля Акрэсціна. Цяпер іх павезлі туды самых. Заўтра іх будуць судзіць.
Праваабарончы цэнтр «Вясна» паведамляе таксама пра затрыманні ў Магілёве і Светлагорску.
Таксама стала вядома пра смерць Таццяны Міцкевіч – маці 17-гадовага Цімура, якога вельмі моцна збілі падчас затрымання ў жніўні. Кажуць, яе «падкасіла гісторыя гвалту, якую перажыў яе сын».
Новы генеральны пракурор Андрэй Швед паабяцаў дадатковыя захады ў змаганні з пратэстамі ды прыгразіў пакараць кожнага пратэстоўца, у тым ліку ў інтэрнэце.
Міжнародная ізаляцыя павялічваецца
На міжнароднай арэне Еўрапейскі Звяз заявіў, што «так званая інаўгурацыя» Лукашэнкі супярэчыць волі значнай часткі беларусаў. У сувязі з гэтым Брусель вырашыў перагледзець адносіны з Менскам.
Пра адмову ў прызнанні легітымнасці Лукашэнкі заявілі прадстаўнікі ўрадаў Украіны, Нарвегіі і Швецыі, а Канада, ЗША і Вялікая Брытанія плануюць заўтра агучыць санкцыі супраць чыноўнікаў Беларусі.
Таксама стала вядома, што прэзідэнт Украіны Уладзімір Зяленскі скасаваў свой візіт у Беларусь, які быў запланаваны на кастрычнік. І толькі Кітай заявіў, што «пад кіраўніцтвам Лукашэнкі Беларусь зможа аднавіць палітычную стабільнасць».
У беларускім МЗС асудзілі «спробы асобных краін Захаду паставіць пад сумнеў легітымнасць кіраўніка дзяржавы». І гэта пры тым, што з ведамства, як стала вядома, звольніўся нават сын міністра Уладзіміра Макея Віталь, які працаваў у цэнтральным апараце МЗС.
МГ belsat.eu
