Адзінаццаць прэтэндэнтаў на пасаду прэзідэнта Беларусі здалі ў тэрытарыяльныя камісіі больш за 100 тысяч подпісаў выбарнікаў.
Як паведаміў БелаПАНу сакратар Цэнтрвыбаркама Мікалай Лазавік, найбольшую колькасць подпісаў – дзеля вылучэння кандыдатам на прэзідэнта Аляксандра Лукашэнкі – больш як 1,1 мільёна. Ініцыятыўная група Уладзіміра Някляева перадала ў тэрытарыяльныя камісіі прыкладна 160 тысячаў подпісаў, Андрэя Саннікава – каля 150 тысячаў, для падтрымання астатніх прэтэндэнтаў — ад 105 да 120 тысячаў.
“Здалі вельмі шмат подпісаў. Праверка пакажа, наколькі добрасумленна працавалі ініцыятыўныя групы”, – заявіў сакратар ЦВК.
Мікалай Лазавік таксама распавёў аб выпадках фальсіфікацыі подпісаў выбарнікаў. Паводле ягоных словаў, некаторыя чальцы тэрытарыяльных камісіяў паведамлялі, што знаходзілі свае прозвішчы ў падпісных лістах, хоць і не ставілі подпісаў дзеля падтрымання пэўнага прэтэндэнта.
“Магчыма, ініцыятыўныя групы некаторых прэтэндэнтаў працавалі не з выбарнікамі, а з базамі звестак – напрыклад, тэлефоннымі даведнікамі, спісамі ЖЭСаў, паліклінік”, – выказаў меркаванне Лазавік.
Як паведамлялася раней, Цэнтрвыбаркам зарэгістраваў 17 ініцыятыўных групаў, аднак Сяргей Гайдукевіч, Сяргей Рыжоў і Юрый Глушакоў напісалі ў ЦВК афіцыйныя заявы аб адмове ад удзелу ў выбарах.
Яшчэ тры прэтэндэнты: Пётр Барысаў, Сяргей Іваноў і Іван Кулікоў – не здалі подпісаў у тэрытарыяльныя камісіі.
Такім чынам, на гэты момант у кампаніі ўдзельнічаюць 11 чалавек:
– намеснік старшыні Партыі БНФ Рыгор Кастусёў;
– дзейны прэзідэнт Аляксандр Лукашэнка;
– кіраўнік саюзу “За мадэрнізацыю” Алесь Міхалевіч;
– лідар грамадзянскай кампаніі “Гавары праўду!” Уладзімір Някляеў;
– індывідуальны прадпрымальнік з Віцебску Уладзімір Правальскі;
– намеснік старшыні Аб’яднанай грамадзянскай партыі Яраслаў Раманчук;
– сустаршыня аргкамітэту стварэння партыі “Беларуская хрысціянская дэмакратыя” Віталь Рымашэўскі;
– лідар кампаніі “Еўрапейская Беларусь” Андрэй Саннікаў;
– лідар аргкамітэту стварэння Беларускай сацыял-дэмакратычнай партыі (Народная Грамада) Мікалай Статкевіч;
– эканаміст Віктар Цярэшчанка;
– дырэктар Таварыства з дадатковай адказнасцю “Трывіюм” Дзмітрый Ус.
Паводле Выбарчага кодэксу, сапраўднасць сабраных подпісаў тэрытарыяльныя камісіі мусяць праверыць за 10 дзён.
belsat.eu
