Bа ўладаў не атрымалася запужаць людзей пагрозамі ды прафілактычнымі размовамі. Затое спалохаўся Анатоль Куляшоў, які, відавочна, занадта літаральна зразумеў словы Аляксандра Лукашэнкі, што паабяцаў пазбавіць яго пагонаў у выпадку паўтору акцыі 15 чэрвеня. Разгон акцыі ў Менску быў вельмі брутальны – да гэтае пары невядомая дакладная лічба затрыманых, сярод якіх журналіст “Белсату” Алесь Баразенка.
Першыя звесткі з рэгіёнаў::
Гомель – каля 600 чалавек.
Берасце – 500 чалавек.
Горадня – 1500 чалавек, больш за 15 затрыманых.
Віцебск – больш за 200 чалавек, 4 затрыманыя.
Магілёў – 300 чалавек.
Баранавічы – прыкладна 200 чалавек.
Пінск – прыкладна 150 чалавек.
Бабруйск – 150 удзельнікаў
Маладзечна – 120 чалавек, ёсць затрыманыя.
Полацак – прыкладна 80 чалавек
Жодзіна – прыкладна 70 удзельнікаў, 5 затрыманых.
Наваполацк – прыкладна 100 чалавек.
Жлобін – прыкладна 70 чалавек, 1 затрыманы.
Кобрынь – 60 чалавек.
Барысаў – 60 удзельнікаў, 45 затрыманых.
Светлагорск – прыкладна 50 чалавек.
Мазыр – 50 чалавек, 20–30 затрыманых.
Слуцк – 40 удзельнікаў, 25 затрыманых.
Ворша – каля 40 чалавек.
Бярозаўка – 30 удзельнікаў, 7 затрыманых.
Лагойск – прыкладна 20 чалавек.
20:35
Станцыі метро Кастрычніцкая і Купалаўская адчыненыя
20:17
Нягледзячы на тое, што большую частку ўдзельнікаў ужо разагналі ці затрымалі, людзі ўсцяж збіраюцца ў групы па праспекце Незалежнасці ды на Нямізе. Увесь час кагосьці затрымліваюць.
20:04
Каля Цэнтру моды на Нямізе сабраліся некалькі сотняў чалавек. Да іх пад’ехалі два аўтобусы і аўтазакі. Літаральна за некалькі хвілінаў адбыўся брутальны разгон удзельнікаў акцыі, параўнальны з 19 снежня. Людзей хапалі за валасы, за шыю, цягнулі па асфальце і проста збівалі. Людзі крычалі “фашысты!”, аўтамабілі, што ехалі міма, відавочна на знак пратэсту сігналілі, ДАІ штрафуе такіх кіроўцаў.
20:00
Затрыманні не спыняюцца. Спецназ закінуў у аўтазак журналіста “Нашай Нівы”, міліцыянты загружаюць чарговыя аўтазакі. Аднак групы ўдзельнікаў акцыі з’яўляюцца ў іншых месцах. Каля ГУМу некалькі сотняў чалавек, калона ідзе ў бок плошчы Незалежнасці.
19:52
Патэлефанавалі з аднаго з аўтазакаў. У ім 30 чалавек, сярод якіх карэспандэнт “Белсату” Алесь Баразенка і карэспандэнт інтэрнэт-газеты “Салідарнасць” Сяргей Балай. У натоўпе шмат правакатараў ад спецслужбаў. Адзін з іх спрабаваў распачаць бойку, але хлопцы супакоілі яго і перадалі міліцыі.
19:42
Праспект Незалежнасці фактычна зачышчаны. Міліцыянты перамаўляюцца, кажуць, што затрымалі каля 150 чалавек.
19:34
Насупраць французскай амбасады стаяць два аўтазакі, ужо амаль запоўненыя затрыманымі. На іхнае месца едуць чарговыя, людзей усцяж адціскаюць у бок Нямігі. Удзельнікі акцыі паводзяць сябе вельмі спакойна і карэктна, толькі час ад часу чуваць апладысменты, якія падтрымліваюць аўтамабільныя гудкі. Нягледзячы на гэта спецназаўцы без прычыны перыядычна вырываюць па адным ўдзельніку акцыі з натоўпу і кідаюць у аўтобусы ці аўтазакі.
19:30
Затрыманы аператар “БелаПАНу” Павел Падабед. Цяпер журналіст – у аўтобусе.
19:28
Каля гатэлю “Европа” каля паўтары тысячы ўдзельнікаў акцыі. Насупраць іх шыхтуецца сотня спецназаўцаў.
19:23
Шмат каго з удзельнікаў акцыі затрымалі ды пасадзілі ў аўтобусы каля “McDonald’s’у”. Цяпер большую частку натоўпу адціскаюць вуліцаю Энгельса ў бок Нямігі. У рацыях амапаўцаў чуваць загады “рассякаць натоўп, актыўных вырываць”.
19:15
Спецназ намагаўся затрымаць Таццяну Мельнічук – карэспандэнтку BBC, якая здымала падзеі на камеру. Журналістка прыгразіла праваахоўнікам “міжнародным скандалам”, тыя адступілі.
19:12
Увесь праспект Незалежнасці перакрыты. Міліцыянты намагаюцца адціскаць натоўп у бок страўні “McDonald’s”. Людзей на праспекце некалькі тысячаў, аднак немагчыма адрозніць удзельнікаў акцыі ад звычайных мінакоў.
19:08
Спецназ разбіў натоўп на дзве часткі. Да “Макдоналдсу” пад’ехалі аўтазакі са спецназаўцамі”. Тым часам людзі сабраліся ужо на супрацьлеглым баку вуліцы.
19:03
Людзей более. Удзельнікі акцыі занялі ўвесь ходнік ад страўні “McDonald’s” да выхаду ў метро. Спецназаўцы шыхтуюцца і рыхтуюцца адціскаць людзей.
19:02
Затрыманы журналіст “Інтэрфаксу” Руслан Рындзевіч. Спадар Ластоўскі не каментуе затрыманняў журналістаў, адказваючы, што пра гэтыя факты даведаўся толькі ад прадстаўнікоў СМІ.
18:58
Сярэдняя частка праспекту Незалежнасці перакрытая. Транспарт ідзе толькі па скрайніх палосах. На плошчы Перамогі стаяць пустыя зялёныя аўтобусы з надпісам “заказной”, побач з імі машына ДАІ. Відавочна, праспект перакрылі для іх.
18:48
Цягнікі не спыняюцца на станцыі “Кастрычніцкай”, пра што абвяшчаецца ў вагонах метро.
18:41
Паводле кіраўніка прэс-службы ГУУС Менгарвыканкаму Аляксандра Ластоўскага, прысутнасць журналістаў правакуе і падштурхоўвае народ. Такім чынам, месца прадстаўнікоў медыяў – у арцы на вуліцы Энгельса.
18:40
Першыя затрыманні. АМАПаўцы збілі і пацягнулі ў бок аўтазакаў карэспандэнта радыё “Свабода” Алега Груздзіловіча.
18:34
На Кастрычніцкай плошчы ўжо пачалося “рэжымнае мерапрыемства”, таму праход туды забаронены. Аднак ніякіх прыкметаў “мерапрыемства” нябачна – толькі людзі ў чорнай форме.
18:00
У бок плошчы Незалежнасці прапускаюць толькі грамадскі транспарт.
17:30
Плошча Кастрычніцкая ўжо абгароджаная турнікетамі, там прагульваюцца людзі ў чорнай форме.
belsat.eu