Аварыя на ЦЭЦ, навагоднія акцыі і зварот Ціханоўскай. Галоўныя падзеі 31 снежня
Беларусы працягвалі пратэставаць супраць фальсіфікацыі выбараў і гвалту сілавікоў нават у апошні дзень 2021 года.
У Менску, напрыклад, прайшло шэсце жанчын з бел-чырвона-белымі парасонамі. А кіберпартызаны ўзламалі Youtube-канал Акадэміі кіравання пры прэзідэнце, змясціўшы там сваё навагодняе віншаванне.
Але самым чаканым віншаваннем быў зварот абранай лідаркі Беларусі Святланы Ціханоўскай.
А 23:34 беларусы ўжо традыцыйна запускалі святочныя салюты, нагадваючы пры гэтым і пра «народны» артыкул КаАП, паводле якога масава пераследавалі беларусаў.
Улады між тым працягвалі рэпрэсіі. Завезлі ў дыспансер актывістку Ніну Багінскую, якая напярэдадні зладзіла адзіночны пікет.
Ды заблакавалі сайт выдання «Першы Рэгіён».
Таксама з 1 студзеня ў Беларусі перастае працаваць філія расейскага медыя «Интерфакс-Запад».
Сітуацыя ў краіне тым часам працягвае пагаршацца. Гэтак, з раніцы здарылася аварыя на ЦЭЦ-4 у Менску, у выніку чаго без электрычнасці застаўся Фрунзенскі раён. Таксама, паводле Менсктрансу, ад раніцы і да позняга вечара ў раёне ўвесь час узнікалі праблемы з працай тралейбусаў і электробусаў.
Заробкі ў медыкаў – як сярэднія, гэтак і рэальныя – скарачаюцца.
А на прадметы гігіены нават даводзіцца ўводзіць рэгуляванне коштаў.
Відаць, што неўзабаве адзінай крыніцай папаўнення бюджэту могуць застацца штрафы з беларусаў.
МГ belsat.eu
