«Вам ніхто не адкажа». Больш за месяц святароў і вернікаў не пускаюць у Чырвоны касцёл


Ужо больш як месяц Чырвоны касцёл у цэнтры Менску стаіць зачынены і для вернікаў, і для святароў. Афіцыйныя прычыны закрыцця выклікаюць усё большы скепсіс. Пры гэтым час, калі касцёл могуць ізноў адчыніць, застаецца невядомы.

Пажар у касцёле Святых Сымона і Алены здарыўся ўночы 26 верасня. Невядомыя таксама пабілі шыбу ў святыні. І хоць афіцыйна плошча пажару склала ўсяго 20 квадратных метраў, будынак пастанавілі закрыць «на рамонт». Паралельна адлучылі ўсе камунікацыі, а ў каталікоў забралі ключы ад касцёлу, павесіўшы на дзверы пломбы. Афіцыйныя перамовы кіраўніцтва Каталіцкага Касцёлу ў Беларусі з чыноўнікамі плёну не далі. Каля святыні тым часам штодня патрулююць сілавікі, якія перашкаджаюць публічным масавым малітвам ля святыні.

Разбор
Чырвоны касцёл у Менску падазрона зачынілі і нікога не пускаюць. Што кажуць святары, вернікі і ўлады
2022.09.28 15:25

30 кастрычніка на сайце Чырвонага касцёлу з’явілася падзяка вернікам за падтрыманне і заклік надалей маліцца за вяртанне яго вернікам.

«Да гэтага часу на ўсе нашыя звароты да дзяржаўных уладаў мы не атрымалі канкрэтных адказаў», – паведамляецца на сайце парафіі.

На старонках дзяржаўных медыяў пра Чырвоны касцёл апошні раз згадвалі два тыдні таму. Тады, 17 кастрычніка, тэлеканал ОНТ паведамляў, што «парафіянам касцёлу Святых Сымона і Алены ў Менску (або Чырвонага касцёлу) вылучаць часовае памяшканне для малітваў».

Здымак мае ілюстрацыйны характар. Вігілія Вялікай Ночы ў касцёле Святых Сымона і Алены ў Менску, Беларусь. 3 красавіка 2021 года.
Фота: Белсат

Але, паведамілі ў размове з нашым карэспандэнтам у курыі Менска-Магілёўскай архідыяцэзіі, за два тыдні ніякага асобнага памяшкання вернікам так і не далі:

«Чакаем адказу ад дзяржавы на нашыя звароты».

«Лістуемся і чакаем»

Як заявілі ў касцёле, ніякіх адказаў няма: «Са Следчага камітэту толькі паведамілі, што следства працягваецца».

«Лістуемся і чакаем. Шукаем магчымасць аднаўлення службаў. Пакуль безвынікова», – адзначылі прадстаўнікі парафіі.

Рэчаў з касцёлу парафіяне так і не забралі, хоць ад іх гэтага і патрабавалі. Пра адмову забіраць рэчы ў касцёле заявілі 20 кастрычніка, адзначыўшы, што «канструктыўны дыялог» з чыноўнікамі не атрымаўся.

Hавiны
«Канструктыўнага дыялогу» не атрымалася. Чырвоны касцёл адмаўляецца выносіць рэчы
2022.10.20 14:56

Пры гэтым святарам і вернікам дасюль зачынены ўваход у касцёл, таму немагчыма нават ацаніць шкоду святыні ад пажару:

«У касцёл не ступала нага нават мітрапаліта, толькі супрацоўнікаў «Спадчыны» з малаткамі».

Вернуць праз 1,5–2 гады?

Адзін са святароў Менска-Магілёўскай архідыяцэзіі паведаміў, што адмова парафіянаў выносіць рэчы з касцёлу выклікала незадаволенасць мітрапаліта Юзафа Станеўскага:

«Мітрапаліт быў незадаволены. Сказаў не нагнятаць. Сказаў выносіць рэчы. Ведаю, што цяпер напружаная крыху сітуацыя паміж пробашчам і мітрапалітам. А мітрапаліт ува ўсім слухае нунцыя».

Паводле святара, улады запэўніваюць, што вернуць касцёл, калі зробяць у ім рамонт:

«Толькі тэрміны вельмі дзіўныя: 1,5–2 гады. За два гады можна поўную рэстаўрацыю зрабіць. Як ён быў першапачаткова. Толькі сумняваюся, што яны гэта зробяць».

Пішыце лісты

Тэрмінаў, калі адчыняць касцёлу, не змаглі назваць ні ў Адміністрацыі Маскоўскага раёну Менску, дзе месціцца касцёл, ні ў «Менскай спадчыне», на балансе якой ён лічыцца.

Католики празднуют Рождество Христово в Красном костёле в Минске, Костёл святого Симеона и святой Елены, богослужение
Здымак мае ілюстрацыйны характар. Каталікі святкуюць Божае нараджэнне ў Чырвоным касцёле. Менск, Беларусь. 25 снежня 2021 года.
Фота: Белсат

«Там працы ладзяцца. Пакуль ён зачынены. Тэрмінаў я пакуль, на жаль, вам падказаць не магу. Прабачце, у мяне няма такой інфармацыі», – паведамілі ў Адміністрацыі Маскоўскага раёну.

І параілі звяртацца ў «Менскую спадчыну». Але і там адказ быў аналагічны:

«Не магу вам адказаць на гэтае пытанне».

У «Менскай спадчыне» параілі пісаць афіцыйны ліст, «яго будуць разглядаць»: «Вам ніхто не адкажа цяпер на гэтае пытанне».

Тым часам 21 лістапада споўніцца 112 гадоў з моманту асвячэння Чырвонага касцёлу. Святыні, збудаванай вернікамі выключна за ўласны кошт і дзеля ўласных мэтаў. Пытанне, ці адчыніць святыня свае дзверы да гэтай даты, застаецца адкрытае.

Гісторыі
Чырвоны касцёл: як зачынялі раней і як забівалі яго святароў
2022.10.06 17:50

Макар Мыш belsat.eu

Стужка навінаў