Прэзідэнт Турцыі Рэджэп Таіп Эрдаган заявіў, што працягне намагацца залагодзіць сусветны харчовы крызіс. Раней Расея заявіла пра выхад з збожжавай угоды, піша выданне «Anadolu».
Турцыя будзе працягваць свае намаганні, каб служыць чалавецтву, заявіў прэзідэнт гэтай краіны Рэджэп Таіп Эрдаган:
«Як вядома, каля траціны сусветнай вытворчасці пшаніцы прыпадае на Украіну і Расею. Вы самы блізкі сведка нашых намаганняў даставіць гэтую пшаніцу ў краіны, якім пагражае галодная смерць. Дзякуючы механізму, які мы распрацавалі ў Стамбуле, мы забяспечылі адноснае памяншэнне харчовага крызісу, прапанаваўшы 9,3 мільёна тонаў украінскай пшаніцы на службу свету».
Прэзідэнт дадаў, што Расея вагаецца і дзеіць нерашуча.
Раней міністр нацыянальнай абароны Турцыі Хулусі Акар пасля заяваў Расеі пра выхад са збожжавай угоды сказаў, што працягвае перамовы і каардынацыю з калегамі ў аднаўленні экспарту збожжа.
Расея ўвечары 29 кастрычніка заявіла, што выходзіць са збожжавай угоды пасля нападу на караблі Чарнаморскага флоту ў Севастопалі. Але, не зважаючы на гэта, караблі з зернем выйшлі з партоў Украіны. Пра гэта дамовіліся прадстаўнікі ААН, Турцыі і Украіны.
Алена Аляксандрава belsat.eu